Federasyonê Elewîyanê Ereban ê Ewropa, dima ke grûbê cîhadî kewtê Sûrîye, derheqê hedîseyan de beyanatê çapemenîye da û va ‘Ma veng danê rêxistinanê mîyanneteweyî, rêxistinanê sivîlan û pawitoxanê heqanê însanan ê Ewropa ke vera na dramaya însanîye de hîşyar bibê.’
Federasyono ke merkezê ci bajarê Almanya Neuss de yo, ard ziwan ke dima ke HTŞ Sûrîye de dest na hukmatî ser o, heme kesê ke wayîrê kultur, dîn, bawerî û ciwîyayîşê sekulerî yê, vera yew tehlukeyê girde de yê.
‘Ma veng danê ke vera na drama û qirkerdişê muhtemelî yê elewîyan de hîşyar bibê’
Beyanatê çapemenîye de ame vatene ke şer û zordarîya ke Sûrîye de serran ra yo dewam kenê, dima ke HTŞ dest na hukmatî ser o resaya merheleya tehluke û wina dewam kerd: “Hedîseyê ke Lazqîye, Tartus, Hama, Hums û cayanê bînan de qewmîyenê eşkera nîşan danê ke ameyoxê komelanê etnîk û dînîyan yê Sûrîye tehdît kenê. Elewî, Erebî, Kurdî, Êzidî, Suryanî, Durzî, Îsmaîlî, Ermenî û Xirîstîyanê bînî, kesê ke wazenê sekuler biciwîyê û her kesê ke ‘cîya fikirîyeno’ binê tehdîdê HTŞ û rêxistinanê terorî yê îslamîyan de tena mendê.
Federasyonê Elewîyanê Ereban ê Ewropa wazenê ke hemverê tehlukeyî de hetkarî bêro dayene û heterogênîya Sûrîye bêro pawitene. Federasyon veng dano ke wa rêxistinê mîyanneteweyî û neteweyî yê Ewropa, rêxistinê sivîlî, partîyê sîyasî û pawitoxê heqanê însanan vera na drama û qirkerdişê muhtemelî yê Elewîyan de hîşyar bibê û hetkarî bikerê.”
