Nûnerê MEBYA-DERê Nurî Salgucak têkildarî salvegera qedexeyên derketina derve yên Cizîrê got: “Li Cizîrê zarok û pîr jî di nav de 288 kesan jiyana xwe ji dest dan. Gelê Kurd tu car ji bîr nake û heta kujer bên cezakirin wê têkoşîna xwe bidomîne.” Parazvanê Mafê Mirovan Akin Bîrdal jî anî ziman ku şer tenê mirovan nakuje, xwezayê jî tune dike.
Komeleya Alîkarî, Piştevanî, Yekitî û Çandê ya bi Kesên Xizmên Xwe li Dergûşa Şaristaniyê Winda Kirin re (MEBYA-DER), bi boneya salvegera qedexeyên derketina dervê yên navçeyên Cizîr û Silopiyayê li ber avahiya Partiya Wekhevî û Demokrasiyê ya Gelan (DEM Partî) a Cizîrê daxuyanî dan. Nûner û rêveberên DBP, DEM Partî, Tevgera Jinên Azad (TJA), Dayikên Aştiyê, nûnerên sazî û rêxistinên sivîl ên Şirnexê, Serokê Rûmetê yê Komeleya Mafên Mirovan (ÎHD) Akin Birdal û gelek kes tevlî daxuyaniyê bûn.
Endamê MEBYA-DERê Nurî Salgucak daxuyanî xwend. Nurî Salgucak bi bîr xist ku di 79 rojên qedexeyên derketina derve yên Cizîrê de 288 kesan jiyana xwe ji dest dan û cenazeyê 11 kesan hê jî nehatiye dîtin. Nurî Salgucak destnîşan kir ku tevî 9 sal di ser qedexeyan re derbas bûne jî kujer nehatinê cezakirin û axaftina xwe wiha domand: “79 rojan gelê me ji hemû pêdiviyên xwe yên mirovî bêpar man. Di malên xwe de birçî û tî man. Komkujiyên ku hatin kirin bû sedema travmayên mezin ku nayên ji bîrkirin. Gelê Kurd Cemîle Çagirga ya ku 9 rojan cenzaeyê wê di sarincê de mabû, pîtika 3 mehî Miray ku ew û bapîrê xwe bi hevre hatin kuştin, Mehmet Erdogan ê ku ji bo newiyên xwe çûbû nan bikirê hatibû kuştin û cenazeyê wî bi rojan di kolanê de hatibû hiştin tu car ji bîr nake û heta kujer neyên cezakirin wê têkoşîna xwe bidomîne.”
‘Polîtikayên şer zerarê dide mirovahî û xwezayê’
Bi domdarî Nurî Salgucak anî ziman ku desthilata AKP-MHPê polîtikayên şerê taybet ên li dijî gelê Kurd didomînê û bi polîtikayên bê cezahiştinê baweriya li edaletê jî ji holê rabûye. Nurî Salgucak diyar kir ku polîtikayên şer li Kurdistan, Tirkiye û Rojhilata Navîn bûye sedema aloziyên mezin û wiha domand: “Şer zirarên mezin dide hemû mirovahî û xwezayê. Di şerê li Sûriyeyê de bi sed hezaran jin, zarok, kal û pîr û bi sed hezaran mirovan jiyana xwe ji dest dan, bi mîlyonan mirov jî koçber bûn. Em êrîşên çeteyan ên li ser gelê me yê Rojava qebûl nakin, şermezar û lanet dikin. Em ji vir careke din dibêjin; Şer ne çareserî ye. Diyalog û muzakere rêya herî însanî û wijdanî ya çareseriyê ye. Ji bo aştiyeke mayînde divê şert û mercên pêwîst bên afirandin, tecrîd bê rakirin û muxatabê çareseriyê bi Birêz Abdullah Ocalan re dest bi dîyalogê bikin.”
Akin Birdal: Şer tenê mirovan nakuje
Piştre Serokê Rûmetê yê ÎHDê Akin Birdal axivî û balkişand ser hefteyê mafê mirovan û got: “Li gor qanûnên navneteweyî yên mafê mirovan hemû kes beyî nasnamê, ziman û reng wekhev e. Ji bo mafê gerdûnî bên parastin hevpeymanên navneteweyî hatinê îmzekirin. Lê mixabin mirov ji van mafan bêpar hatinê hiştin. Şer tenê Mirovan nakujin. Ax û sewalan jî dikuje. Ji ber wê em aştiyê ji bo hemû zindîwarên gerdûnê dixwazin. Em ji bo hemû kesî aştiyê dixwazin û hevî dikin careke din ew êş nayên kişandin. Ji bo aştiyeke were vî welatî divê hemû kes di nava liv û tevgerê de bin.”
