Girtiyên Girtîgeha Ewlehiya Bilind a Kirşehîrê bi rêya malbatan bang li hemû saziyên demokratîk û parazvanên mafên mirovan kirin û xwestin her kes ji bo aştiyê deng bidin azadiyê.
Girtiyên PAJK û PKK’î yên di girtîgehên bakurê Kurdistanê û Tirkiyeyê de tên ragirtin di serê salê de têkildarî êrişên Tirkiyeyê û komên wê yên paramîlîter ên li ser Bakur û Rojhilatê Sûriyeyê daxuyanî dabûn. Li ser navê girtiyan, Denîz Kaya anîbû ziman ku gelê Rojava bi biryar in ku destkeftiyên azadiyê yên li Rojava bi fedayîtî û lehengiyên mezin hatine bidestxistin, biparêzin û wiha gotibû: “Em berxwedana destanî ya gelê Rojava û hevrêyên xwe yên li eniyan li dijî gefa qirkirinê li ber xwe didin, silav dikin. Felsefeya azadiyê ya Rêber Apo ji bo gelên Rojhilata Navîn ronahiyeke hêviyê afirand û di şênberiya Şoreşa Rojava de veguherî meşaleya azadiyê û ji bo lêgerînvanên jiyana alternatîf, bûye îlham. Şoreşa Rojava bûye taca serketinê ya têkoşîna me ya 40 salan. Ev şoreş bûye serketina hemû gelên bindest a li hemberî modernîteya kapîtalîst. Serketina li Rojava, pêl bi pêl belav bû û xwedî karakterek welê ye ku hemû Rojhilata Navîn û cîhanê bandor bike. Roj, roja parastina yekîtî, berxwedan, parastina şoreşê û xwedî derketina li felsefeya azadiyê ya Rêber Apo ye.”
Piştî daxuyaniya girtiyên PAJK û PKKê, girtiyên ku li Girtîgeha Ewlehiya Bilind a Kirşehîrê dimînin, ji bo piştgiriyê bidin banga xwedîderkedina felsefeya azadiyê ya Abdullah Ocalan, bi rêya malbatan bang kirin. Girtiyan bang li hemû kesên demokrat, xwedi wîcdan û parazvanên mafên mirovan kir ku piştgiriyê bidin kampanya “Deng bidin azadiyê” û wiha gotin: “Em bang li gelê xwe û rêxistinên demokratîk dikin ku piştgiriyê bidin kampanya “deng bidin azadiyê.” Em dixwazin gelê me xwe tev li pêvajoyê bikin. Em jî wekî girtiyên li zindanan xwe tev li vê kampanyayê dikin û deng didin azadiyê.”
Girtiyan bal kişand ser zextên li ser girtîgehê ji û anîn ziman ku kiryarên keyfî yên li dijî girtiyên siyasî didome û wiha gotin: “Girtî dikarin rojê saetekê derkevin hewşê hewayê bistînin. Dîsa pirtûkan asteng dikin. Li gorî xwe pirtûkan didin. Pirtûkên ku girtî dixwazin nadin. Dema diçin nexweşxaneyê dîsa dixwazin li devên girtiyan binerin. Ji ber ve yekê girtî naxwazin biçin nexweşxaneyê. Dema ku girtî binpêkirinan îtîraz dikin rayedar dibêjin ‘Ev der girtîgeha ewlehiya bilind e’ wisa ye. Dîsa girtiyên nû tên vê girtîgehê li wan lêgerîna tazî ferz dikin.”
