Wan – Hevserokê Şaxa ÎHDê ya Wanê Mehmet Salîh Coşkûn, destnîşan kir ku girtiyên nexweş rewşa wan giran in û xwest hemû girtiyên nexweş bê şert û merc demildest bêne berdan.
Li Tirkiyeyê binpêkirinên mafên mirovan ên di girtîgehan her ku diçe zêdetir dibe. Herî zêde mafên girtiyên nexweş tên binpêkirin. Desthilata heyî bi polîtîkayên dijminatiyê nêzîk girtiyan dibe. Tevî astengkirina mafên girtiyan ên jiyanî, girtiyên nexweş bi awayekî rêk û pêk nayên tedawîkirin û girtî bi mirinê re rû bi rû tên hiştin. Li gorî rapora Komeleya Mafên Mirovan (ÎHD) ku di 28ê nîsanê de li Amedê eşkere kirin, hezar û 412 girtiyên nexweş hene. Ji van girtiyan 230 girtiyên nexweşiya wan giran in û nikarin bi tena serê xwe bijîn.
‘Divê bê şert û merc bên berdan’
Hevserokê Şaxa ÎHDê ya Mehmet Salîh Coşkûn ku ew jî di nava komîsyona girtîgehan a rapora girtiyên nexweş amade kiribûn de ye, bal kişand ser rewşa girtiyên nexweş û diyar kir ku ji girtiyên nexweş 230 girtî bi tena serê xwe nikarin bijîn. Mehmet Salîh Coşkûn, anî ziman ku di nava van hezar û 412 girtiyan de kesên divê hertim di bin kontrolê de bin hene û got: “Gelek girtiyên ku divê emeliyat bibin hene, girtiyên çavên wan nabînin û guhên wan nabihîzin hene. Hewceye ku înfazên van hezar û 412 girtiyan bê şert û merc bên sekinandin û tedawiyên wan li der ve li gor şert û mercên nexweşxaneyekî baş bê kirin.”
‘ATK raporê nade’
Mehmet Salîh Coşkûn, da zanîn ku ji bo berdena girtiyên nexweş rapora Saziya Tip a Edlî (ATK) hewce ye û bi lêv kir ku ATK tevî nexweşiyan wan jî raporê nade girtiyan. Mehmet Salîh Coşkûn, destnîşan kir ku ji bo berdana girtiyên nexweş divê qanûnek bê derxistin û ev tişt li axaftina xwe zêde kir: “Yan jî divê efûyeke bi giştî bê derxistin ku ev girtiyên nexweş bên berdan û jiyana xwe li derve bidomînin. Em hêvîdarin ku ev pêvajoya nû ya aştiyê tevî girtiyên nexweş bandoreke erênî li ser hemû girtiyan bike. Lê mixabin heta niha jî ti gav nehatine avêtin. Di navbera DEM Partî û Wezareta Dadê de hevdîtin hene, lê hêj ti pêşketin çênebûne. Em hêvîdar in ku ev pêvajo bibe sedema berdana giştî ya girtiyan. Her wiha divê berdana girtiyên nexweş girêdayî ti pêvajoyan nebe, pêvajo tinebe jî li gor rûmeta mirovan divê tedawiya girtiyên nexweş bê kirin û ew bên berdan.”
Banga hestyariyê kir
Mehmet Salîh Coşkûn, bang li wezaret û dadmendiya Tirkiyeyê, raya giştî, partiyên siyasî û saziyên sivîl kir û got ku di girtîgehan de rewşeke gelek xerab heye. Mehmet Salîh Coşkûn, diyar kir ku girtiyên nexweş di girtîgehan de jiyana xwe ji dest didin û wiha dawî li axaftina xwe anî: “Heke li girtîgehê jiyana xwe ji dest nedin jî, di rewşeke wisa de tê berdan ku di nava demeke kin de jiyana xwe ji dest didin. Ji bo ev mirin nebe qedere girtiyên nexweş, hewceye ku bê şert û merc bên berdan ku weke miroveke birûmet jiyana xwe bidomîne. Ji bo vê yekê jî divê xebatên qanûnî bên kirin û girtî bi lez bên berdan.”
