Dîcle Ehmed ke wextê hêrişê DAIŞ’î yê hemverê Kobanê de, Kobanê de rojnamegerî kerdêne, dîyar kerd ke xoverdayîşo ke a roje ame dayîş, ewro Tişrînî de yeno ciwîyayîş û vat: “Senî Kobanê DAIŞ’î rê bi goristan, do Tişrîn zî Tirkîya û grûbanê paramîlîteran rê bibo gor.”
Serra 2014î de DAIŞ’î hêrişê Kobanê kerd û 134 rojan dima, bi xoverdayîşêko pîl Kobanê ame xelisnayîş. Şarê kurd her cayê Kurdistanî de semedê Kobanê vejîyayî meydanan û dormeyê Kobanê de bîyî xelek. Serekê AKP’yî Tayyîp Erdoganî vat: ‘Kobanê ver bi kewtişî yo’. Hemverê nê vatişî de cinî û şarê Kobanê xoverdayîşê xo mojna û mohrê xo da tarîxî ro.
Rojnameger Dîcle Ehmed ke o wext xoverdayîşo ke hemverê DAIŞ’î de ame dayîş, dinya rê da eşnawitiş, ewro zî Tişrînî de bena vengê xoverdayîşî.
‘Ma xoverdayîşî qeyd kerd’
Dîcle Ehmed ê kesê ke xoverdayîşê Kobanê de dinyaya xo bedelnaye yad kerdê û wina dewam kerd: “Her kesê ke bi ruhê Kobanê Tişrîn de xo ver danê, silam kena. Ez zî Kobanê ra ya, wexto ke xoverdayîşê Kobanê dest pêkerd, mi rojnamegerî kerdêne. Wexto ke şer dest pêkerd, mi kameraya xo girewte û ez şîya cepheyê şerî. Mi hewl da xoverdayîşê şerwanan ê hemverê DAIŞ’î uca bi kameraya xo kom bikera. Sewbîna mi hewl da ke bimojna şar senî wareyê xo ra koçber bîyo û senî dej anto. Çîyê ke ma ciwîyayî zaf cîya bîyê. Mi dî ke şerwanî senî bi çekêke asayî, hemverê çekê barbar û giran yê DAIŞ’î xo ver danê. Şerwanan pêwa pêro bêîmkanîya xo mojna ma ke do Kobanê DAIŞ’î rê bibo gor.”
‘Her kerrayê Kobanê de xoverdayîş ameyo nuştiş!’
Dîcle Ehmed bale ant dîmenanê prosesê Kobanê ser o û vat: “Mi dîmenê ke şerwanê ke bi çeka normal hemverê tankêk têkoşîn kenê ant. Nê ra teber dîmenê wextê koçkerdişê şarî ez zaf tesîrê xode verdaya. Seba ke şar mîyanê zehmetîyanê pîlan ra vîyart. Şerwananê YPJ û YPG’yî Kobanê de tarîx nuşt. Her kerrayêka Kobanê ser o tarîxo pîl ê xoverdayîşî ameyo nuştiş. Ma di ke senî ciwanê çar parçeyê Kurdistanî herikyayî Kobanê.”
‘Roja ewilî Kobanê ser kewt’
Dîcle Ehmet dewam de wina vat: “Kobanê bi vatiş û bawerîya Fermandar Ebû Leyla yê ‘Kobanê do DAIŞ û hevalanê ci rê bibo gor’ serkewt. Kobanê roja yewin ê hêrişan de serkewt. Seba ke a roje her kesî soz dabî ke do xover bidê. Şerwanî zî vatişê xo ser vindertî û efsaneyê xoverdayîşê Kobanê dinya de vila bi. Ê serdemî de ma xeylêk çî dîyê, ma sey rojnameger mîyanê şert û mercanê xeylê zehmetî de bîyê, her siba ma xatir yewbînan ra waşt. “Me hewl da ke pêwa hûmara kêmî û pêro astengîyê Tirkîya û Başûrê Kurdistanî de bibê vengê xoverdayîşî.”
‘Senî ke Kobanê DAIŞ’î rê bi gor…’
Dîcle Ehmet bale ant çîyê ke ewro Tişrîn de yenê ciwîyayîş û vat: “Hemkarê DAIŞ’î vatêne, ‘Kobanê kewt, do bikewo’. Ewro reyna vano, ‘Tîşrîn kewt, do bikewo’. La xoverdayîşê serra 2014 û 2015î ewro Tişrîn de yeno dayîş. Embazê ma yê ke ma vîndî kerdê est ê ke bibê vengê raştî. Şehîd Cîhan û Nazim nimûneyê tewr pîl ê. Ma soz danê pêro embazanê xo yê şehîdan. Ma do her tim bibê vengê heqîqetî. Embazê ma yê rojnamegerî hêrişê Tişrînî de birîndar bîyî, la ma do her tim bibê vengê raştî. Senî ke Kobanê DAIŞ’î rê bi gor, do Tişrîn zî semedê Tirkîya û grûbanê paramîlîter ê girêdayeyê aye bibo gor. Ma do nê xoverdayîşî nîşanê heme dinya bikerê.”
