Arşîvê Newroza Amedî yo ke bi kedêka girde ameyo pêserkerdene, sey vîro gandar yê şarê kurdî ma do pêşkêşê şima bikerê. Nê rêzevîdeoyî ke ma do parçe-parçe pare bikerê, do sey pirdêke mabenê vîyarte û ameyoxî de ca bigîro û nê ruhê azêkî ra derbasê azanê bînan bikerê.
Mîyanê kurdan de wexto ke Newroze yeno vatene sey Roşanê Neteweyî yeno vîrê merdimî. Newroze mîyanê kurdan de bîyo kultur û roşanêk seserran. Newroze ke sey destpêkê mewsîmê wisarî zî yeno pênasekerdene la seba kurdan hem roşan o hem zî xoverdayîşê azadî yo.
Vakurê Kurdîstanî de Newroz heta serranê 2000î qedexe bîye. Dîmen û fotografê ke verê serranê 1990î û badê serranê 2000î vejîyayê meydan û nê serran ra mendê binê hişê her kurdêkî de ca gênê. Nê dîmenê wayîrê muhîmîyêk û maneyêk girdî bî. Nê şaristanan ra yew ke Newroze bi heybet û bi xoverdayîş pîroz kerdêne zî Amed o.
Mîyanê nê dîmenanê kehenan de merdim bi zelalî vîneno ke verva heme zext, şîdet û polîtîkayanê çetinî yê nê serran, şarê Amedî bê ke biterso, bi waştişêko gird ver bi waranê pîroz herikîyayêne. No zî îşareto tewr xurt ê ruhê serewedaritişî yo ke Newroze roşanêk ra vurna û kerd warê tewr gird ê eşkerakerdişê nasname û estbîyayîşê neteweyî.
No arşîvo bêemsal yo ke serra 1999î ra dest pêkeno û heta wisarê 2025î dewam keno, vîro gandar yê şarê kurdî ke mîyanê serranê tewr çetin û sîya de zî çilaya azadîye her wext geş kerda.
Nê rêzevîdeoyî, hîkayeyê şarê kurdî ke binê her tewir şîdet û zextî de zî bêters sloganê azadî û xoverdayîşî berz kerdê, bi renganê kesk, sûr û zerd waranê Newroze de xerîteya zerrîya xo xêz kerda. Waranê Newroze de merdim rastê dengizê merdiman beno ke bi mîlyonan zerrî eynî wextî de seba aştîyêka birûmet û azadîyêka domdare dano piro. Nê warê ke sey mozaîkî renganê kesk, sûr û zerd ameyê xemelnayene, nê zî danê mojnayene ke îradeyê şarê kurdî resayo astêka wina berz ke êdî sînor û bendî nêeşkenê vernîya nê ruhî de vinderê.
Gama ke şima nê parçeyanê vîdeoyan ke ma bi baldarî amade kerdê, temaşê bikerê, şima do bi çimanê xo bivînê ke warê Newroze atmosferê tewr gandar û sozdarîya şarê kurdî seba erd û kulturê xo, her dîmenî reyde newera şîyar benê.
No heyecan o ke çimanê her kesî de xo dano teber, mizgînî wisarêko newe û cuyêka birûmete dano komelî.
