Endamê Konseyê Merkezî yê TTB’yî Mehmet Şerîf Demîrî va: “Eke prosesêk dest pêbiko, verê cû ganî hepsîyê nêweşî bêrê veradayene.”
Badê “Vengdayîşê Aştî û Komelê Demokratîkî” yê Rêberê Şarê Kurdî Abdullah Ocalanî, çimî agêrayî hukmat û dewlete ser o, PKK’yî badê nê vengdayîşî îlan kerd ke adirbest ronayo. Badê vengdayîşê Ocalanî heme şar raya pêroyî paweno ke hukmat do game bierzo.
Goreyê malumatanê Komela Heqanê Merdiman (ÎHD) 2021î ra, zîndanan de 651 hebî giran û tewr tay 1517 hepsîyê nêweşî est ê. Goreyê eynî malumatan 2024î de neway aşmanê verênan de tewr tayî 50 hepsîyanê nêweşan cuya xo vîndî kerda.
Endamê Konseyê Merkezî yê Yewîya Tabîbanê Tirkîya (TTB) Mehmet Şerîf Demîrî va ke veranêdayîşê hepsîyanê nêweşan qerarêko sîyasî yo.
Demîrî îfade kerd ke ê vera şerî vindenê çunke “Şer problemê weşîya şarî yo” û va: “Eke prosesêk dest pêbiko, verê cû ganî hepsîyê nêweşî bêrê veradayene. Reyna ganî astengê ke verê resayîşê weşîye de yê, bêrê wedarnayene û xizmetê weşîye yê munasibî bêrê pêşkêşkerdene.”
