Serekanê sazgehanê derheqe qirkerdişe elewîyanê Sûrîya ser o eşkerayî daye. Eşkerayî de ame dîyarkerdene ke do 7ê Adare Samandag de mîtîng bêro viraştene û seba tewrbîyayîşê mîtîngî Sereka AFA’yî Suzan Saka, Hemserekê AABK’î Huseyîn Mat û PSAKD’î Cuma Erçe vengdayîş kerd û waşt ke bilez qirkerdiş bêro vindarnayene.
Sereka Pêroyî ya AFA’yî Suzan Saka derheqê mîtîngî de ajansê PîrHa’yî rê qisey kerd û vat ke 7ê adare roja şeme saete 13:00 de qezaya Samandag de parqa serra 75. de, seba qirkerdişê elewîyanê Sûrîya benê, ma do vajê bes û dîyar kerd ke ê Avusturalya ra paştî danê çalakîyanê nûmayîşî ke rêxistinê elewîyan pîya kenê.
Ma vengê xo xurt bikerê
Suzan Saka dîyar kerd ke HTŞ û DAIŞ’î mîyanê na serra peyêne de sere de elewî, kurd, suryan, hiristîyan û misilimanê ke sekuler ê, înan ser o qetlîamanê xo domnenê û bale ante nê probleman ser o û wina vat: “Temamê dinya vera binpaykerdişê heqanê merdiman, qetlîam, qirkerdiş û neheqîyan goşê xo girewtê.
Ma sey sazgehê elewîyan welatê ke ma tede ciwîyenê, serrgêra Qirkerdişê 7ê Adare de heme çalakîyî ke do bêrê viraştene, ma seba înan vengdayîş kenê. Çi Tirkîya de beno çi Ewropa de çi zî Avustralya de beno, tewrê çalakîyanê protestoyî bibê. Seba vindertişê qetlîaman ganî ma vengê xo xurt bîkerê û ma bikerê ke mehkemeyanê mîyanneteweyî de wa kiştoxî bêrê muhakemekerdene.
Dewletê ke destek danê hukmatê Colanî, seba qirkerdiş vindero û nê helwêstê xo yê şaşî ra fekveradê, ma reyna veng danê înan. Rumêtê merdimîye tena seba xo vera zulmî vindertiş û têkoşîndayîş nîyo. Eynî wextî de bawerîyê ke merdimî ra dûrî bê, kultur, etnîsîte û cinsîyetan reyde vera neheqî û zulmî de vindertiş o.”
‘Ganî ma kişta şarê xo de bê’
Hemserekê AABK’yî Huseyîn Matî dîyar kerd ke qirkerdişanê Sûrîya de bi hezaran elewî ameyê qetilkerdene û wina vat: “Bi hezaran kesî mecbûr mendî ke ca û warê xo terk bikerê. Hema zî canê ma cuya înan binê tehdîd û tehluke de ya. 7ê Adare de Samandag de ma yenê têhet, amancê ma lanetkerdişê nê qetlîamî yo. Seba cuya cananê ma bêra garantîkerdene, ma do vengê xo berz bikerê û ma heme dost û cananê xo dawetê mîtîngê 7ê adare yê Samandagî kenê.”
‘Cananî bêrê ma bibê yew’
Hemserekê Pêroyî yê PSAKD’î Cuma Erçeyî vat ke ê sey tornanê Pîr Sultan Abdalî têkoşînê xo her ca de xurt kenê, sere de Sûrîya û Filîstîn de û heme dinya de vera qetlîaman û zulmî vindertişê înan do dewam bikero û wina vat: “Serrgêra qirkerdişî de seba vindertişê qirkerdişan ganî ma dest bidê yewbînan û mîtîngê 7ê adare de bêrê têhet. Ma vanê ke ey cananî bêrê ma bibê yew.”
