Hemverfekê Tora Heqanê Domanan ê Amedî Erdal Aladag derheqê awankerdişê Meclîsê Domanan de va ke doman seba ke heqanê xo bipawê û têkoşîn bidê, înan no meclîs awan kerdo.
Konseyê Şaristanî yê Amedî 22ê gulane de Meclîsê Domanan ê Amedî awan kerd. No meclîs seba ke heqanê domanan bipawê do xebatanê xo bido destpêkerdiş û do domanan sîyasetê şaristanî de bikero wayîrê qerarî. Derheqê armanc û xebatanê Meclîsê Domanan de Hemverfekê Tora Heqanê Domanan ê Amedî Erdal Aladag ajansê ma (AW) rê qisey kerd.
‘Wa domanî qeraranê xo bidê’
Hemverfekê Tora Heqanê Domanan ê Amedî Erdal Aladag va ke seba awankerdişê Meclîsê Domanan verê zî hewldayîşî est bî la no meclîs cîya yo û wina qisey kerd: “Meclîs seba ke domanî siyasetê şaristanî de bieşkê vatişanê xo vajê û cayê xo xebatan de bigîrê ame awankerdiş. Coka no meclîs seba ma zaf avzel o. Peynîya hewteyî do îdareyê meclîsî bêro eşkerakerdiş. Ma zî sey yew koma şêwirmendî do hetkarîya meclîsî bikerî. Meclîsê Domanan sey meclîsanê bînan do cayê xo Konseyê Şaristanî yê Amedî de bigîro. Gere domanî êdî siyasetê şaristanî de ca bigîrê. Qerarî ke doman eleqedar kenê, gere domanî qerar bidê.”
‘Gere gedeyî xebatan de ca bigîrî’
Erdal Aladagî dîyar kerd ke gedeyî nêeşkenî qerarî de ke domanan eleqedar kenê, ca bigîrê û wina va: “Derheqê domanan de xebatî yenê kerdiş la xebatan de gedeyî çîn ê. Ma wazenê domanî xebatan de ca bigîrê û yew şaristanê embazanê domanan ronê. Seba domanan banî yenê awankerdiş la qetî nêkenê no çî domanan ra bipersê. Domanî qeraranê şaristanan de çin ê. Şaristanî ke gedeyî qeraran de ca bigîrê, ê şaristanî hetê demokrasî ra zaf aver şinê.”
Erdal Aladagî ard vîrî ke sere de gere her kes heqanê domanan bipawo û qiseykerdişê xo wina qedîna: “Gere gedeyî her ca de qeraranê xo bidê. Ewro behsê zafziwanî yeno kerdiş la ma seba Amedî nêeşkenî behsê nê bikerî. Gedeyî bi meclîsî şênê heqanê xo bipawê. Badê zî vateyê xo vajê. Gedeyî seba ziwanê dayîke şênê xebatanê xo meclîsî de bikerê. Seba şaristanan vîr zaf avzel o. Ewro no vîr yeno xovîrrakerdiş. Ma şênê bi rayîrê meclîsî yew vîrî awan bikerê. Nika meclîs do domanî ke merkezê şaristanî de ciwîyenê, hetê înan ra bêro awankerdiş. La ma do rojanê ameyoxî de hewl bidî ke domananê dewan zî beşdarî meclîsî bikerî. Badê gedeyî do zereyê xo de îdareyê xo ronê û dest bi xebatan bikerê. Badî ke bernameyê meclîsî eşkera bi, ma do hetkarîya domanan bikerî.”
