Serekê Baroya Amedî Abdulkadîr Guleç diyar kerd ke gamê gerîlayanê Hereketê Azadîya Kurd eştê tarixîyê û va: “PKK xêlî gamê xurtî eştî nayera dima ganî dewlete verpersê nê gaman bido û qanûnanê newîyan virazo.”
Rêberîya Hereketê Azadîye yê Kurdistanî bi çarçoveya biranê 12. Kongreya Partîya Karkeranê Kurdistanî (PKK) de 26ê Teşrîna verêne de herêma Qendîlî de eşkerayîyêk dê. Eşkerayîye de dîyar kerd ke gerîlayê xo yê ke Kurdîstana Bakurîderê înan peyde ancenê Herêma Pawitene yê Medya. Eşkerayîye ra dima nê mijarî ser zaf munaqeşe û şîroveyê ameyî kerdene.
Serekê Baroya Amedî Abdulkadîr Guleçî derheqê bira Hereketê Azadiye yê Kurdistanî de Ajansa Welat (AW) rê qisey kerd.
‘Wa zemînê hiqûqî bêrê rastkerdene’
Abdulkadîr Guleç diyar kerd ke rojanê tarixîyan ra ravêrayîş yeno kerdene û wina va: “PKK’yî eşkerayîyê dê û dîyar kerd ke mîyanê sînoranê tirkîya ra biancîyê. Nê prosesî 1yê Teşrîna verêne yê 2024an dest pê kerd bî. Na gama pêyde antîşî no proses ard merhaleyêka newîye. 27ê Sibate de birêz Abdullah Ocalanî seba aştî û komela demokratîke vengdayîşê kerd. PKK’yî zî bira xo fesixkerdene girewte û 11yê aşma Temuze de çekê xo veşnayî. Bado zî Meclîs de yew komîsyon ame awankerdene ke na zî gamêka mihume bîye la belê gama en xurte peyde antişê gerîlayan bîye. Na game hem seba aştî hem zî seba komela demokratîke ameyê eştene. Na game verê prosesî kena ya. Nika nayera dime ganî dewlete tayê gamanê xurtan bierzo. Yanê nê gerîlayanê ke çekê xo veşnê, nêyêke peyde ancîyê, nê kurdê ke zindanan de rê, kurdê ke sirgun de rê ganî derheqê nînan de dewlete verpersîyê bido. Senên qanûnî bêrê viraştene? Nînan ser vindo û ganî zemînêko hiqûqî bêro awankerdene. La belê hîna zî gamêk nêeşta. Eke qanûnê neweyî virazîyê vernîya nê prosesî bena ya û kena xurt.”
‘Wa qanûnê teror û înfazî bêrê ravaznayene û qanûnê neweyî bêrê vetene’
Abdulkadîr Guleçî ard ziwan ke hewceyê qanûnan û gamanê neweyan esto û wina va: “Kesanê ke çekê xo nayî ro ganî derheqê înan de dewa ya nêbo. Seba naye zî hewceyê qanûnanê neweyan esto. Bi hezaran kesî ewro zindanande rê û teberê welatî de ciwîyenê. Sebebê nînan pêrune çaresernêkerdena meseleya kurdana. Seba naye zî hewceyê qanûnanê neweyan esto. Ma zî sey Baroya Amedî vazenîme ke ‘qanûnê teror û înfazî’ bêro ravaznayene. Nî 9 aşmande hetê PKK’yî ra xêlî gamî ameyî eştene. Ganî verpersê nê gaman hetê îqtîdar û dewlete ra bêro dayene.”
‘Bi vaten û sîyasetê verî proses avêr nêşono’
Abdulkadîr Guleç sero vinert ke bi vatena “teslîmbiyayîşî” proses rayera nêşono û peynîya vatena xo wina arde: “41 serrî yo ke vengdayîşê teslîmbîyayîşî yeno kerdene. La nê vengdayîşî ra çîyêk nêvecîya. Xo ra kesê ke ancîyê teberê sînoran teslîmbîyayene qebul nêkenê. No çîyê de rast nîyo. Seba kurdan û şaran pêrune aştîye mihuma û bi vaten û sîyasetê verî proses avêr nêşono. Bi înkar û polîtîkayanê ewlehîye proses avêr nêşono. Ganî rêber û sîyasetkarê dewlete nê vatenan ra fek veradê. Çapemenî zî ganî ziwanêko weş û rast xizmeta aştiye biko.”
