Abdullah Înan o ke 32 serrî hepisxane de ameyêne girewtene, veradîya û bi hewayêko girseyî ame pêşwazîkerdene.
Abdullah Înan o ke 32 serran bi îdiaya “endamtîya rêxistine” hepisxane de ameyêne girewtene, veradîya. Abdullah Înan hetê TUAY-DERa Êlihî, MEBYA-DER, TJA, Dayîkê Aştî, partîyê sîyasî, temsîlkarê sazgehanê sîvîl û merdimanê xo ra bi hewayêko girseyî ame pêşwazîkerdene.
‘Ganî ma her ca de yewîya xo awan bikerê’
Hemserekê TUAY-DER’î Hasan Arigtekînî dimayê pêşwazîkerdişî qisey kerd û wina vat: “Çimê keyeyê ma û heme embazanê ma roşnî bê, aqubet Rayber Apo û embazanê ma ser o bo. Hêvîya ma a ya ke heme embazê ma ke zindan de yenê girewtene, bêrê veradayene. Ma hemverê keda heme embazanê ke 30 serrî têkoşînêko bêemsal danê, bejna xo tewînenê. Ganî ma tifaq û yewîya xo bidê awankerdene. Ma vînenê ke ewro îqtîdar senî plan û projeyanê xo Kurdîstan ser o rayra benê. Bi nê hewayî ganî ma her ca de yewîya xo xurt bikerê.”
‘Ma dest bidê yewbînan ma do serkewê’
Abdullah Înanî zî qiseykerdişêko kilm kerd û nê çîyî vatî: “Eke ma ewro vanê kulturêkê ma est o, ganî ma wayîrê ê kulturî vejîyê. Eke ma wayîrê nê kulturî nêvejîyê, ma do hemverê kêna û xortanê xo bikewê kemaneyî, seba ke înen bedêl dayo. Demo ke ma xeyalanê înan bîyarê ca, ma do bieşkê vajê ma wezîfeyê xo ardo ca. Raybertî zî her tim vano newera awan bikerê. Eke ma heme dest bidê yewbîna ma do serkewê.”
Derheqê Abdullah Înanî de
Abdullah Înan serra 1994î de Sêrt de ameyo girewtene, bi îdiaya “Endamtîya rêxistine” DGM de amebi muhakemekerdene û bi cezayê muebedî amebi cezakerdene. Abdullah Înan dima ke Sêrt de ame girewtene, uca ra bi dore surgunê Amed, Erzirom, Dîlok û tewr peyên zî Hepisxaneyê Şakran ê Alîaga de ame girewtene. Abdullah Înan Hepisxaneyê Alîaga ra ame veradayene.
