Rayberê Şarê Kurdî Abdullah Ocalan mesajê xo de yo ke şarê Mexmûrî rê şawit, vat: ”Bêşik bi averşîyayîşê prosesî şarê ma do agêro herra xo. Ma do meseleyanê komelkî, sîyasî û huqûqî bi hewayêkê kolektîfî bîgirê dest.”
Rayberê Şarê Kurdî Abdullah Ocalan şaro xoverdayox o ke rîyê zextê dewleta tirke ra 31 serrî yo verî Ertuş, Bêhêrê, Nînowa û tewr peynî de Kampa Multecîyan a Şehîd Rustemî yê Mexmûrî de ciwîyeno, ci rê mektubêk şawit.
Şarê kampe semedê wendişê mektubê Rayberê Şarê Kurdî Abdullah Ocalan verê Dezgehê Keyeyanê Şehîdan de ame têhet.
Wextê wendişê mektubî de herê hîsgêrî ameyî ciwîyayene. Şarê ke sloganê “Bijî Serok Apo!” vatî, qerardarîya xo reyna îlan kerd.
Mektubê Rayberê Şarê Kurdî Abdullah Ocalan semedê şarê Mexmûrî wina yo:
”Şarê Mexmûrî yê erjîyayeyî rê;
Ez pêro şarê ma yê Mexmûrî rê zerrîya safî ra selamanê xo şawena. Şarê ma yê Mexmûrî tarîxê têkoşînê ma yê azadîye de rolo zaf muhîm kay kerd, bi wayîrê erjê pîlî. Rixmê pêro zordarîyan bi pratîkê xo ramojna ke xoverdayîş ciwîyayîş o, qehremanê pîlî vetî meydan û baro giran ê têkoşînî girewt xo ser. Ispat kerd ke şertî senî benê wa bibê cuya azade her çîya cor a. Bi qerardarîye û keda xo bi layîqê şarê kurdî û têkoşînê ci.
Ez bawer kena ke şarê ma yê Mexmûrî senî ke wextê verênî de estûna têkoşînê ma bi wextê prosesê Aştîye û Komelê Demokratîkî eynî rol û mîsyonê xo bîyaro ca. Bi mîrasê têkoşînî do bibo sey hêzê dînamîkî yê nê prosesî, berpirsîyarîye bîgero û serkêşîye bikero. Nuqtayêka pêvînayîşê ma zî rewşa şarê Muxmûrî ya. Bêşik bi averşîyayîşê prosesî şarê ma do agêro herra xo. Ma do meseleyanê komelkî, sîyasî û huqûqî bi hewayêkê kolektîfî bîgirê dest. La wa no bêro zanayene ke gerek nizdîbîyayîşo şexsî û keyeyî nêvejîyo vernî. Ma do meseleyanê komelkî, sîyasî û huqûqî bi hewayêkê kolektîfî bîgirê dest û na çarçewe de ver bi çareserî rayra şirê.
Ez derheqê pêro multecîyan ê Mexmûr û Ewropa de wina fîkiryena: Agêrayîşê şima pêrune do kolektîf bo û ma do cografya bewlî bikerê. Şima wazenê agerê?
Ma vanê qey nîma nîm wazenê peyser agêrê. Gerek ma peyser agêrayîşî sey kolektîfî bifîkirê. Na çarçewe de ez sere de cinî û ciwanî pêro şarê Mexmûrî rê selam û heskerdişê xo yê xorinan û bêpeynî şawena.”
