Abdullah Ocalan: “Komare reyde problemê ma çin o. Meseleya bingeyin a ya ke Komare demokratîk nîya. Demokrasî çareserîya tekane ya ke do xurtkerdişê Komare temîn bikero.”
Heyetê Îmralîyî yê DEM Partî derheqê pêvînayîşê xo yê Rayberê Şarê Kurdî Abdullah Ocalanî reyde na eşkerayîye daye:
“27ê Adare 2026î de çarçeweya pêvînayîşan de ke ma Birêz Abdullah Ocalanî reyde kenê, Girawa Îmralîyî de kombîyayîşêk viraşt.
Pêvînayîşan de ke ameyî kerdene, eşkera bî ke proses resayo daraxêko muhîm. Na game de ame nîşandayene ke rayîrê çareserîye babetêka çend qatî ya ke ganî hetanê muzakere, îradeyê demokratîkî û berpirsîyarîya tarîxî reyde pîya bêrê erjnayene.
Wezîfe û berpirsîyarîya tarîxî ya ke Meclîsê Tirkîya nê prosesî de girewto xo ser, ame nîşandayene û dîyar kerd ke xebatê ke badê raporê Komîsyonî do bêrê kerdene, bê ke bêrê taloqkerdene, ganî biresê çarçewaya qanûnîye ya pêroyî û girde ke heme beşan xo de biheqêno.
Erjnayîşan de ke ma sey heyetî kerdî, seba ke firsendê tarîxî neşêrê û îradeyê çareserîya raştikêne gandar bibo, akerdişê xetanê dîyalogî û xurtkerdişê sîyasetê demokratîkî hewce yo, wina fikrê hemparî vejîyayî vernî.
Îfade bî ke komelê demokratîkî seba heme şaran û bawerîyan ke Tirkîya de ciwîyenê, temînatê ameyoxî yo. Bawerîye est a ke her keso ke nê prosesî raşt fehm keno û bi berpirsîyarîye nêzdî beno, tena ewro ney, ameyoxê hemparî zî paweno.
Erjnayîşê Birêz Ocalanî ke pêvînayîşî de kerdî, bi kilmkî wina yê:
“No problemo girs ke ma cehd kenê çareser bikerê, ganî bi nêzdîbîyayîşêko teng nêro ewnîyayene. Çike Rojhelatê Mîyanênî de plananê hegemonîkî yê xorînî est ê. Sûrîye de rewşanê dejdayoxan reyde tayê averşîyayîşê pozîtîfî zî qewmîyenê, nika zî şerê Îranî rojeve de yo. Şerê Îranî de hîrê xetî vejîyayî meydan: Yewin, xeta Amerîka-Îsraîlî ya. Dîyin xeta tayê hêzanê mîyanneteweyîyan û herêmkîyan a ke Îngilîstan pêşengîya ci keno û wazenê statûkoyê xo bipawo. Hîrêyin zî xeta demokrasî û pîyaciwîyayîşî ya ke ma bi Prosesê Haştîye û Komelê Demokratîkî awan kerd û piştî danê ci. Averşîyayîşê Îranî, raştîye û muhîmîya prosesî ke Tirkîya de yeno ramitene, newe ra eşkera kerd.
Ma çareserîyêka dormeyê Anatolya-Mezopotamya de esas gênê. Têkilîyê Anatolya-Mezopotamya tarîxî de kokanê xorînan de resenê pê. Peymana Kadeşî ya mabênê Hîtît û Misirijan peymana haştîye ya yewine ya tarîxîye bîye. Tarîxê sîyasî yê çar hezar serrî yê Rojhelatê Mîyanênî nîşan da ke asayîşê Anatolya Rojhelatê Mîyanênî û Mezopotamya ra vîyareno. Entegrasyona demokratîke beşdarîya kulturê Mezopotamya sey estbîyayîşêko demokratîk îfade kena.
Komare reyde problemê ma çin o. Meseleya bingeyin a ya ke Komare demokratîk nîya. Demokrasî çareserîya tekane ya ke do xurtkerdişê Komare temîn bikero.
Dîyarkerdişê xeletîyan, hedravîyartîye û antîdemokratîzmê komelan û welatan ê demê tarîxî, ganî sey destdayîşê muqedesî nêro fehmbîyayîş. Ganî bêro vatene ke piştîdayîşê metodanê asîmîlasyonî bi bawerîyêka pozîtîvîstîye, îşligêko teng o ke Tirkîya ser o yo.
Senî ke vengdayîşê 27ê Sibate de mi zî îfade kerd, demê têkoşînê çekdarî qedîya. Êdî agêrayîşêk mumkîn nîyo. Proseso ke ma tede yê, ver bi Komara Demokratîke û haştîye prosesê vîyartişî yo. Eke proseso ke yeno waştene, bieşko bireso serkewtişî, Komare do di qat biba xurt. Çîyo ke ma vanê komelo demokratîk, bi giranî no tewir çareserîyêk esas gêno. Ganî komelbîyayîşîyêk û fehmê hemwelatîbîyayîşî awan bikerê ke têkilîya kurdan dewlete reyde bi hawayêko pozîtîf serûber bikero. Dewlete zî uca de ganî bivîno ke çîyo xirabker yan talûkeyê asayîşî çin o.
Beşdarîya Komare; bi nasname, azadîya îfade û fikrî, azadîya rêxistinbîyayîşî û azadîya cinîyan bibo. No, tena seba kurdan ney, seba heme kesan warê azadîye yê.
Na game de ez muhîm vînena ke fikrê mi derheqê prosesî raşt bêrê fehmbîyayîş, bi metodanê munasîban bieşkê biresê heme raya pêroyîye.
Çareserîya entegrasyona demokratîke nêzdîbîyayîşêko komelkî esas gêno. seba çareserîya komelkî zî demokratîkbîyayîşê kolektîfî zî pêroyîya awanîyanê komelkîyan hewce keno.”
