Bi pêşangîya TUHAD-DER’a Botanî Rayberê Şarê Kurdî Abdullah Ocalan û girewteyanê sîyasî rê mektubê serrneweyî ameyê erşawitene.
Qezaya Cizîrî ya Şirnexî de hetê Komela TUHAD-DER’î ya Botanî ra bi munasebetê serrneweyî Rayberê Şarê Kurdî Abdullah Ocalan û girewteyanê sîyasî rê mektubî ameyê erşawitene. Parlamentera DEM Partî ya Şirnexî Newroz Uysal Aslan Mehmet Zekî Îrmez, endam û rayberê partîyanê sîyasî, sazgehê komelê demokratîkî û xeylê welatijî vernîya Postaxaneyê Cizîrî de kom bîyê û verê ke mektuban bierşawê eşkerayî daye.
‘Ganî girewteyê nêweş û sîyasî bêrê veradayene’
Endamê TUHAD-DER’î yê Botanî Avukat Huseyîn Sedar Sulgerî dîyar kerd ke ê mektuban tena seba pîrozkerdişê serrneweyî nêerşawenê û wina qisey kerd: “Tewro ke hetê Birêz Ocalanî ra prosesêk ameyo destpêkerdene zî hema zî zîndanan ser o kerdişî dewam kenê. No nêyeno qebulkerdene û ganî bilez girewteyê nêweş û heme girewteyê sîyasî bêrê veradayene. Ma hêvî kenê ke serra newa seba heme embazanê ma yê girewte biba wesîleyê azadîye.”
Dima ra Huseyîn Sedar Sulger, parlamneter Newroz Uysal Aslan û Mehmet Zekî Îrmezî zî qisey kerd. Parlameneteran waşt ke serra newa seba Rayberê Şarê Kurdî Abdullah Ocalan û heme girewteyanê sîyasî rê biba serra azadîye.
Dimayê qiseykerdişan mektubî ke ameyê nuştene Rayberê Şarê Kurdî Abdullah Ocalan û girewteyanê sîyasî ke hepisxaneyanê cîya de yenê girewtene, înan rê ameyê erşawitene.
