Rayberê Şarê Kurdî Abdullah Ocalan 6 serrî ra pey pêvînayîşê avûkatan de warê sîyasetî rexne kerd, êyê ke menfeat û rantî dima kewtî, veng da înan ke nê prosesê vîyartişî de “qanûnê demê mabênî” bêrê vetene.
Avûkatanê Bûroyê Huqûqî yê Seserre, 15ê êlule de Hepisxaneyê Tîpê F’yî yê Îmralî de serran pey reya yewine Rayberê Şarê Kurdî Abdullah Ocalanî reyde pêvînayîş kerd. Avûkat Razîye Ozturk ke pêvînayîşî de ca girewt, derheqê prosesî de erjanyîşê Rayberê Şarê Kurdî Abdullah Ocalan Apoyî ajansê JINNEWS’î rê vatî.
Warê sîyasetî îradeyêko zeîf mojneno
Razîye Ozturk JinNewsî rê qisey kerd û vat Rayberê Şarê Kurdî Abdullah Ocalanî vato warê sîyasetî wayîrvejîyayîşê prosesî de “îradeyêko zeîf” mojneno.
Ozturk wina vat: “Ey tesbît kerdo ke meseleyê bingeyinî nêyenê dîyene, menfeat û rantî dima kewtî, şerê nînan kenê. Pêvînayîşî de vat çarçewaya neteweyê demokratîkî de ciwîyayîşêko hempar û projeya komara demokratîke de îsrar keno û qewetê ey o teorîk û pratîk seba tetbîqkerdişê naye est o. Ey vat sîyaset zî ganî goreyê naye hereket bikero, nê prosesî rê têduşt înîsyatîf bigîro û rolêko aktîf bigîro xo ser, no seba awankerdişê aştî zaf muhîm o.”
6 serrî ra pey pêvînayîşo yewin
Razîye Ozturk vat 2019î ra nat reya yewine pêvînayîşê avûkatan bîyo, Rayberê Şarê Kurdî Abdullah Ocalanî ra vete Hamîlî Yildirim û Omer Hayrî Konarî reyde zî pêvînayîş kerdo. Ozturk vat pêvînayîşî de cîhazê qeydî akerde bîyî û binê nezaretê memurî de bîyî:
“Ma Rayber Ocalanî reyde teqrîben saet û nême, muwekîlanê bînan reyde zî nêmseate pêvînayîş kerd. Muwekîlanê ma Hamîlî Yildirim û Omer Hayrî Konarî zî 10 serran ra dima reya yewine avûkatan reyde pêvînayîş kerdo, seba înan no pêvînayîş zaf muhîm bî. Zîndanêko bîn de bi hezaran saetî heqê pêvînayîşê avûkatan est bî, tîya pêro asteng bîyî. Heme pêvînayîşî cîhazê qeydî akerde û binê nezaretê personelî de bîyî. Rayber Ocalan û muwekîlê bînî zaf keyfweş, xurt û biqerar bîyî.”
Razîye Ozturk vat Rayberê Şarê Kurdî Abdullah Ocalanî meseleyê kurdî yê hetê sîyasî, komelkî, kulturî û ekonomîkî ancax bi reformanê huqûqî eşkeno bêro çareserkerdene:
“Rayber Ocalanî zî badê înîsyatîfê xo nê averşîyayîşan ser o erjnayîşî kerdê û vat meseleyê kurdî hetê sîyasî, komelkî, ekonomî, kulturî zaf hetê xo est ê û encax bi reformanê huqûqî eşkenê bêrê wedaritene. Nê prosesê vîyartişî de ganî qanûnê demê mabênî bêrê vetene û gamê goreyê ney bêrê eştene.”
Erjnayîşê heqê hêvî
Rayberê Şarê Kurdî Abdullah Ocalanî seba qerarê Komîteya Wezîran a Konseya Ewropa yê derheqê “heqê hêvî” de zî erjnayîşî kerdî û vat Komîte bîyo taloqker. Ozturk vat: “Komîsyon ganî goreyê hewcedarîyanê prosesê aştî û komelê demokratîkî hereket bikero, hem heqê hêvî hem zî muxatabê tewr muhîm ê prosesî Rayber Ocalan o û goşdarkerdişê ey nêeşkeno bêro taloqkerdene. Komîteya Wezîran zî qerarê xo yê mabênî de vat, Meclîs ganî teklifê qanûnî yê pêşkêşkerdeyan rew qebul bikero û îdareyê huqûqî yê lazimî bikero, hem huqûqî hem sîyaseten azadîya Rayber Ocalanî ya fîzîkî mecburîyetî ya.”
Vengdayîşê cinîyan
Razîye Ozturk vat Abdullah Ocalan muhîmîya pêşengîya cinîyan a prosesî ser o zî vindert: “Rayber Ocalanî vat tarîxê komelî de îstîsmaro yewin warê cinsîyetî de bîyo û paradîgmaya demê neweyî bingeyê azadîya cinîyan ser o awan kerdo. Na çarçewa de cinîyan prosesê awankerdişê demê neweyî de rolê pêşengîye girewto û o naye muhîm vîneno.”
