Rayberê Şarê Kurdî Abdullah Ocalan çarçewaya 25ê Teşrîna Peyêne mesajêk erşawit û vat: “Tu hemleyê azadîye yê komelkî, azadîya cinîyan nêgirê merkezê xo, nêeşkenê bibê şorişêko rasteqîn. Ma azadîya cinîyan seba xo esas girewte.”
Rayberê Şarê Kurdî Abdullah Ocalan bi munasebetê 25ê Teşrîna Peyêne Roja têkoşînê Mîyanneteweyî ya Vera Şîdetî yo ke Cinîyan rê Yeno Kerdene, mesajêk raya pêroyî reyde pare kerd. Mesajê Rayberê Şarê Kurdî Abdullah Ocalanî wina yo:
“Komel awanîyêka sinife yê yew tebeqa ra nîyo, komel qadêkê têkoşînî yê bi bingeyê cînsî, tarîxî û zaf tebeqeyan ra yeno pê. Problemê destpêkî û yo tewr pîl ê merdimîye, şorişê eleyhdar o ke bi kolekerdişê cinî, dest pêkerd û hêrişê komelkîbîyayîşî kerd ke derûdorê cinî de awan bîyo. Şîdetê mîyanê keyeyî, kiştişê cinîyan, zilmê zîhnîyetê camêrdîye, heme zî nîşane û dewamê nê hêrişê tarîxî yê. Awanîya kastîk a ke hêrişê komunalîte û komelkîbîyayîşê derûdorê cinî kena, dima Mezopotamya de bedilîya meclîsê homayan, rahîbanê Sumeran û uca ra zî bedilîya firewun û qralan, bi nê hewayî zilmê zîhnîyetê camêrdîye yê komelî ser o, daîmî kerd.
Nê serdemî de cinî madeyê xam yê tewr qîymetdar ê kapîtalîzmî yê. Bedenê ci yeno rotiş, şexsê ci bazaran de yeno pêşkêşkerdiş. Cinîya ke ruhê ci hetê camêrdî ra zî ame îşxalkerdiş, bi nê xençerê koletîye vera ke mezgê pederşahî dayo paşte aye ro. Hîyerarşîyê komelkî yê bi hakimîyê camêrdî ke hetê şerê şaristanîyê hezar serran ra ame awankerdiş, şîdet û şer bi xo ra ano. Şaristanîya camêrdî ya bi dewlete ziwan, berardiş, bedena cinîyan, dima ra zî komel înan ra girewt. Heta ke no heqîqet nêro dîyayîş semedê azadîye gamî nêeşkenê bêrê eştiş.
Rewşa bi problemê ya ke sîstemê bi hakimîyê camêrdî kerdo mîyanê cinîyan ganî bêro fahmkerdiş û çareserkerdiş. Wexto ke merdim kiştişê cinîyan, şîdetê keyeyî de, şîdetê cinîyan ser, kolonîyê semedê cîyakerîyê cinsî bîyarê verê çimanê xo, wina sewîyeya koletîye texmînan ra zêdeyêr gird û berz a. Cinî bi temamî ameya vistiş. Heqîqetê ci ameyo qelibnayîş. Ê xirxalê ke cinî semedê xeml û rewşe kenê xo ra, ê xizêmê ke kenê zinca xo, heme zî nîşaneyê koletî yê ke tarîx û heta nika ameyê. Modernîteya kapîtalîstî de koletîya cinîyan hîna kûr bîya, sîstem cinî vurnayo hacetê bazar û xemlî. Semedê xelasîya nê koletîya bi rêk û pêk, semedê azadîya lazimî bi kûrbîyayîşêko gird û rêxistinbîyayîşêko xurt est o.
Tu hemleyê azadîya komelkî, heta ke azadîya cinîyan nêkero esasê xo nêeşkeno bibo şorişêko raşt. Têkilîyê mabêne cinî û camêrdan de zaf tehlukeyîn vînena. Ma azadîya cinîyan xo rê kerde esas û bi nê rengî têkilîyan ercnayî. Beşo tewr gird ê karê ma, karê cinîyan o. Muhîm o ke têkilî û nakokîya mabêne cinî û camêrdan de bêro fahmkerdiş. Ma hakimîyê camêrdî ke azadîya cinîyan asteng keno û cinîyan bi her tewirî keno kole analîz kerd, ercna. Ma sosyolojîya azadîye awan kerde. Eşkera yo ke cinîbîyayîş zehmet o, xelasbîyayîş zî asan nîyo labelê ganî cinî no bi cesaret bikero. Semedo ke xençerê hakimîyê camêrdî ke ginayo paşta merdimîye ro bêro vetiş û cuya azad û demokratîk bêro awankerdiş, ganî serkêşîye bikero.
Abdullah Ocalan”
