Rayberê Şarê Kurdî Abdullah Ocalanî Îmrali ra bi rayîrê vîdeoyî vengdayîşêko tarîxî kerd. Rayberê Şarê Kurdî Abdullah Ocalanî nê vengdayîşî kerd: “Asta ke ma resayî ma mecbûr keno ke ma bikewê mîya pratîkî. Ez hêzê çekî ra ney la hezê sîyaset û aştîya komelî ra bawer a û vengdana şima zî ke şima zî nê prensîbî bikerê merîyetî.”
Vendayîşê Rayberê Şarê Kurdî Abdullah Ocalanî wina yo:
“Embazê erjîyayeyî,
Ez sey erkê xo yê etîkî hesibnena ke ez safhaya têgêrayîşê ma yo embazîya komunale, rewşa ci ya zelale û derheqê mesele û çareserîyan de bi mektubêko hîra reyna eşkera bikera û cewabanê afernayoxan bida.
1-Ez Vengdayîşê Aştî û Komelê Demokratîkî yê 27ê Sibate hema zî pawena.
2-Ez Kongreya şima ya PKK’yî ya 12. sey cewabêko pozîtîfî û hîra seba vengdayîşî erjnena.
3-Na nuqtaya ke ma resayê ci tarîxî û erjîyaye ya. Xîretê ke seba na nuqta embazan sey pirdêkî kerdo zî erjîyaye û cayê hûrmetî yo.
4-Peynîya pêro qewimîyayîşan de mi Manîfestoyê Komelê Demokratîkî amade kerd ke ganî no sey vurîyayîşê tarîxî bihesibîyo. No manîfesto eşkeno manîfestoyê “Rayîrê Şorişê Kurdîstanî” yo 50 serrî îkame bikero. Ez wina bawer kena ke no manîfesto tena seba komelê kurdan ê tarîxî ney seba komelanê global û herême zî wayîrê cayê tarîxîyî yo. Ez pê şik nêkena ke no manîfesto seba tradîsyonê manîfestoyê tarîxî nimûneyêk o.
5-Ez wazena naye bi zelalî îfade bikera ke nê pêro qewimîyayîşî netîceyê pêvînayîşanê min ê Îmraliyî de bîyê. Ma kerd ke bi dîqatî nê pêvînayîşan bingeyê îradeyê azadî de bikerê.
6-Na nuqta de ganî hinî bi gamanê neweyan bi hewayêko pratîk bêrê caardene. Muhîm o ke ma îfade bikerê ke na safha û nê gamê hewceyî zî tarîxî yê, coka wa hol fam bibê û krîterê ci bêrê caardene.
a-Têgêrayîşê PKK’yî yo ke amancê ci awankerdişê dewletêke bîyo û vera înkarê estbîyayîşî vejîyabi orte û stratejîya PKK’yî ya şerê felata neteweyîye hinî ameyî qedînayene. Estbîyayîş ame şinasnayene coka armanco esas ameyo caardene. Naye ra PKK ameyo qedînayene. Nê esasî ser o rexne û xorexnekerdişê hîrayî do dewam bikerê.
b-Seba ke sîyaset do vengîye qebul nêkero, ganî na vengîye bi bernameyê ‘Komelê Demokratîk û Aştî,’ strayejîya ‘sîyasetê demokratîkî’ û huqûqê pêroyîyî bêra dekerdene.
c-Muhîm o ke nê prosesî de çekî bi hawayêkê zerrîwazî bêrê verdayene û Meclîs de komîsyonêko qanûnî û selahîyetdar o hîra bêro ronayene. Şert o ke eqlo teng û feraseto ‘xoperestî’ nêbê û gamî bi baldarî û bi hesasîyet bêrê eştene. Ez zanena ke gamê ke do bierzîyê pûç nêbê. Ez samîmîyetî vînena û pê bawer kena.
d-Naye ra yeno xîretkerdene ke gamê hîna pratîkî û hîna zelalê ke do kilîdan akerê bêrê eştene. Tezê ke hetê mi ra ameyê pêşkêşkerdene wina yê:
1-Gerek her kes çîyo ke keweno milê ci bikero, resayîşê hedefê ‘Aştî û Komelê Demokratîkî’ bi perspektîfê entegrasyonalîstî yê pozîtîfî mumkun. Netîceya pêro vatişan de: PKK waştişê netewe-dewlete caverda, na çarçewa de estbîyayîşê xo qedîna. Yeno pawitene ke na nuqtaya tarîxî dahîna bêra averberdene.
2-Seba ke semedê meclîs, komîsyon û semedê şarî hinî şik memano ma eşkera çeke ronenê, wa no normal bêro vînayene. Ronayîşê mekanîzmaya çekan do prosesî aver bêro. Merhaleya têkoşînê biçeke ra vîyartişê bizerrî yê merhaleya sîyasetê demokratîkî û huqûqî yo. Vîndîkerdişêk nîyo, qezenckerdişo tarîxî yo. Gerek wina bêro erjnayene.Detayê ronayîşê çekan do bêrê dîyarkerdene û lezabez do bêrê caardene.
3-DEM Partîya ke binê serbanê meclîsî de ya do partîyanê bînan reyde semedê serkewtişê nê prosesî çîyo ke destê ci ra yeno, bikero.
4-Nê mabênî de pêro metnanê qerarî de azadîya mi sey şertê qetî yena vatene. Seke şima zî zanenê ke mi çirey azadîya xo sey meseleyêka şexsîye nêdîya. Hetê felsefîyî ra zî azadîya şexsan komelî ra cîya nîya. Çend ke şexsî azad bibê komel azad beno, çend ke komel azad bibo şexsî zî azad benê. Eşkera yo ke goreyê ney do bêro têgêrayene.
Ez hêzê çekan ra ney hêzê sîyaset û aştîya komelkî ra bawer a. Û ez venga şima zî dana ke şima zî nê krîteran bîyarê ca.
Serebûtê ke rojanê peyênan de herême de qewimîyayê, mojnenê ke na gama tarîxî çend muhîm û lezgîn a.
Ez ganî vaja ke ez rexne û fikranê şima yê seba prosesî û destekanê şima pawena. Ez bi coş û hewesî pare kena ke ez amade û pê bawer a ke nê nîqaşî do herême, welat, ma, Hêzanê Modernîteya Demokratîke biresnê safhayêka stratejîke û taktîke, bernameyêkê neweyî û ma nika ra amadekarîya ney kenê.
Ez seba dewrê verê ma veng dana ke qerarê kongre û nê pêşnîyaz û fikrê mi yê ke nê nuşteyî de ca gênê bêrê caardene û esasê serkewtişî ser o qewimîyayîşî bêrê averberdene.
Silam û heskerdişî reyde û tim bi hemrayîyêka bêpeynî bimanê.
19ê Hezîrana 2025î
Abdullah Ocalan.’’
