Parlamentera DEM Partî ya Mardînî Bêrîtan Guneş Altin vat ke ê do bi xoverdayîşê Newroze wayîrê vengdayîşê Rayberê Şarê Kurd Abdullah Ocalanî vejîyê. Endamê Meclîsê Ciwanan ê DEM Partî Rêzan Kaganaslan zî vat ke “Ma do Newroze bikerê Newroza Raybertîyêko Azad.”
Deklerasyonê Newroza 2025î pêşengîya Kongreya Komelo Demokratîk (KCD), Partîya Herêmanê Demokratîk (DBP), Tevgerê Cinîyanê Azad (TJA) û Partîya Têduştî û Demokrasîyî ya Şaran (DEM Partî) vernîya Sûranê Amedî yê qezaya Sûrî ya Amedî de ame dayene.
Startê Newroza ke emserr bi sloganî “Raybero Azad, Komelo Demokratîk” yena pîrozkerdene qezaya Licê ya Amedî de ame dayene. Parlamanterê DEM Partî Omer Ocalan û Bêrîtan Guneş Altin, Hemserekê DBP’yî yê Amedî Mehmet Şîrîn Gurbuz û Meclîsê Ciwanan ê DEM Partî, Hemşaredarê Licê Dîlek Dîyar Ozer û Firat Demîr û Hemşaredarê bînî yê qezayan, rêxistinê DEM Partî yê merkez û qezayan û xeylê welatî tewrê programê Newroze bîyê. Qad bi alanê DEM Partî yê kesk û sûr û zeran ame xemilnayene. Cinî û ciwanî bi cil û belganê xo yê kurdîyan tewrê Newroze bîyê.
‘Rayberê Şarê Kurd rayîrê ma akerd’
Hemserekê DBP’yî yê Amedî Mehmet Şîrin Gurbuz ewil qisey kerd. Mehmet Şîrin Gurbuz qala vengdayîşê Rayberê Şarê Kurd Abdullah Ocalanî kerd û wina vat: “Rayberê Şarê Kurd rêzdar Ocalanî rayîrê ma akerd. Seba ke heme dinya de cuyêka azade komelêko demokratîk bêrê awankerdene, ma peyê nê vengdayîşî yê. Newroza to pîroz bo rêzdar Ocalan.”
‘Lazim o dewleta tirke destê aştî bigîrê’
Mehmet Şirîn Gurbuz dîyar kerd ke serra verîya ma do biba serra azadîya şarê kurd û Abdullah Ocalanî û wina vat: “Şarê kurd dewaya aştî domneno. Serra vernîya ma de do azadîya şarê kurd û Abdullah Ocalanî bêra ca. Erd û herra şarê kurd gonî rê mird bîya. Lazim o dewleta tirke destê aştî bigîra. Ma heqê xo ziwanê xo û îradeyê xo pawenê. Serkewtiş yê şarê kurd o.”
‘Newroze seba şarê kurd vejîn a’
Nameyê Meclîsê Ciwanan yê DEM Partî ser o Rêzan Kaganaslan qisey kerd. Rêzan Kaganaslan Newroza şarê kurd pîroz kerd û vat: “Newroze seba şarê kurd hem hetê polîtîk hem zî hetê xozayî ra xeylê bi manadar a. Ewro toximê cuye yenê eştene. Cuye danê xoza. Newroze seba şarê Rojhelatê Mîyanên û Rojhelatê Asya roşanêko polîtîk o. Eynê wextî de Newroze seba şarê kurd vejîn a. Newroze bîye sembolê xoverdayîş ê. Ma do Newroze bikerê Newroza Rayberêko Azad. Na Newroze da ma game bi game vengdayîşê rêzdar Ocalanî hembêz kenê.”
‘Ma pîya aştîyêk awan bikerê’
Rêzan Karaaslan da zaanyene ke şar û ciwanî eşkenê şekil bidê nê prosesî û vat: “Ma kirde û aktor ê. Ganî şarê ma partîya xo û serekê xo bawer bo. Ma do pîya aştîyêk awan bikerê. Eke wisarî rê bibê asteng ma do bibê toximê cuye û koyan de vila bibê. Ma tîya de yê û xeta ma zelal a. Ma sozê aştîyêka birûmet danê şima. Newroza şima û Newroza Raybero Azad pîroz ba.”
‘Licê seba ma vejîn a’
Parlamentera Dem Partî ya Mardînî Bêrîtan Guneş Altin dîyar kerd ke Vakûrê Kurdîstanî adirê Newroze reya ewil Licê de wekenê û wina vat: “Senî ke 47 serrî ra ver Licê de adirê Newroze ame wekerdene û seraserê welatî de vila bi do ewro zî vila bibo. Licê seba ma vejîn a. Newroze hezar reyî pîroz bo. Emserr ma Newroze bi hewayêko tarixî pêşwazî kenê. Adirê Newroze yê şaran 27ê sibate de Îmrali de rêzdar Ocalanî wekerd. O vengdayîşo ke adirê Newroze gir kerd, ma zî qonaxa destpêkê de Licê ra bi adirê Newroze cewab bidê.”
‘Toximo ke 47 serrî ra ver Licê de ame eştene ewro Rojawanî de vilikê xo akerdo’
Bêrîtan Guneş Altin wina dewam kerd: “Toximo ke 47 serrî ra ver Licê de ame eştene ewro Rojawanî de vilikê xo akerdo. Paradîgmaya ke rêzdar Ocalanî seba Rojhelato Mîyanên û şaran nuşta, cuyêka azade awan kena. No pancas serrî yo ke xeylê zor û zehmetîyan vînenê. Mizgînîya serkewtişî nêzdî ya. Rêzdar Ocalan vano Newroze cuyêka newa û azad a. Ganî her roj bibo Newroze. Bi xoverdayîşê Newroze wayîrê vengdayîşê seserrî vejîyê. Roşanê şima yê Newroze pîroz bo.”
Qiseykeridşan ra pey sloganî “Bijî Serok Apo” ame vatene û qadî de gulbang da.
Dima ra adirê Newroze bi tewrbîyayîşê parlamenter û şaredaran ame wekerdene. Newroze bi deyîranê Koma Vejîne ya ke girêdayeyê Merkezê Kulturê Mezopotamyayî (NÇM) ya, qedîya. Girseyî deyîranê Koma Vejîne reyde govende girewte û sayîya Newroze bi çoş pîroz kerd.
