Serekê Gelecek Partî Ahmet Davûtoglûyî vengdayîşê Bahçelî yê derheqê Ocalanî de qisey kerd û va eke proses aver şêro ma şênê PYD’yî reyde qisey bikê. Ey va ke îdareyê Şamî destê ê grûban de yo ke nêzdîyê Tirkîya yê.
Serekê Gelecek Partî Davutogluyî derheqê Sûrîye de T24’ê rê qisey kerd.
Davutogluyî va Kurdê Sûrîye pêro binê kontrolê PKK yan PYD’yî de nîyê. Serekê Gelecek Partî Davutogluyî vengdayîşê Bahçelîyî ser o va: “Eke prosesî de averşîyayîş bibo, kê şênê PYD’yî reyde qisey bikerê.” Davutogluyî derheqê vatişê xo yê ‘Ez AKP’yî ra cîya nîya’ de zî qisey kerd û va: “Hewceyîya pîyayîşêko pîl est a. No yan AKP de beno ya zî teberê AKP’yî de alternatîfêk virazîyeno, ez her diyan rê zî hazir a.”
‘Konseyo Netewî yê Têkilîye ganî bêro ronayene’
Davûtoglûyî derheqê Kurdî û têkilîyan de zî qisey kerd. Ey va ke Kurdî seba Tirkîya tehluke nîyê û ganî ma naye qebul bikerê. “Ê embazê ma yê, ma wayîrê eynî tarîx û qederî yê. Eke problemêk est bo ma ganî qisey bikerê.” Ey va ganî konseyo Netewî yê têkilîye bêro ronayene û tede Kurdê heme cayê Sûrîye est bê.
‘Tena Kurdê Hesekeyî bes nîyê’
Davutogluyî va ke ma ganî tena Kurdê ke Heseke de binê kontrolê PYD’yî de yê nêkerê muhatab. Ganî Kurdê Hama, Heleb û Efrînî ke nêzdîyê Tirkîya yê zî bêrê temsîlkerdiş. Ey dîyar kerd ke Şam de zî teqrîben 50 hezarî Kurdî est ê. Ey va ke ganî ma fikrê “Hemê Kurdê Sûrîye binê kontrolê PKK yan PYD’yî de yê” bivurnê. Ey peynî de va ke eke vengdayîşê Bahçelî de averşîyayîş bibo, ma şênê PYD’yî reyde têkilî ronê.
‘Ganî Kurdî şêrê merkez’
“Eke ez karê ser o bibiyêne mi do wina bivatêne. Dewletêka unîtere tercîhê ma ya la eke Sûrîyeyîjî mabênê xo de seba sîstemê federatîfî pê bikerê no seba Tirkîya tehluke nêbeno. Yewna ca de otonomîyê Turkmenan zî eşkeno bibo. Tena wa nêzdîyê sînorê ma de artêşo biserûberî ra vêşêr yew hêzo mîlîs çin bo. Çîyêko do bêro waştene no yo. Yanî ganî Kandîlêko newe awan nêbo. Wa Sûrîyeyîjî ronişê qerar bidê û ganî nê prosesî de Kurdî de heta nika merkezî de ca nêgirewto bêrê merkez.”
‘Ganî Amerîka reyde bêro qiseykerdene’
“La tîya de aktora tewr pîle Amerîka ya. Ganî Amerîka ra bêro vatene ke hêzê mîlîsî ke tîya de yê bêrê vilakerdene, ê bînî zî tewrê Artêşê Netewî yê Sûrîye bibê yan zî eşkenê bibê polîs. Eşkenê bibê polîsê herême la ganî bi hewayêko do Tirkîya rê nêbê tehluke bêrê amadekerdene.”
