Sîsyasetmedaro kurd Ahmet Turk seba terefgiranê Bursaporî ke Leyla Zana rê heqaret kerd nerazîbîyayîşê xo mojna û vat: “No heqaret vera ma hemînan o. No heqaret vera şarê kurdî yo. Bi nê heqaretî nîjadperestîye reyêka bîne xo mojna.”
Lîgo 2. yê Grûba Sûre ya Federasyonê Futbolî ya Tirkîya (TFF) de roja 16ê kanûne Somaspor û Bursaspor ameyê têhet. Maç qezaya Soma ya Manîsa de ame kerdene. Terefgiranê Bursasporî ke bi nîjadperestî û hêrişkarîya xo yeno zanayene, trîbunanê stadî de neng û heqaretê giranî sîyasetmedara kurd Leyla Zana rê ameyê kerdene. Vîdeoyê nê heqaret û nenganê giran dima ke medyaya dîjîtale ser o vila bîyê, vera terefgiranê Bursaspor û kulubê ey reaksîyon û hêrsêko pîl ameyê mojnayene.
Sîyasetmedaro kurd Ahmet Turk, Serekê Amedsporî Nahît Eren, aktîvîstan TJA’yî Hulya Alokmen û Serekê Baroyê Amedî Abdulkadîr Guleç ajansê ma rê qisey kerd û heqaretê vera Leyla Zana şermezar kerdê.
Turk: No heqaret nîşaneyê nîjadperestî yo
Sîyasetmedar Ahmet Turkî dîyar kerd ke nê heqaretê ke vera Leyla Zana ameyê kerdene vera înan hemînan ameyê kerdene û wina vat: “Nê heqaretî vera ma yê, vera şarê kurdî yê. Nê heqaretî nîşaneyê nîjasperetî yê. Nîjadperestî xo nê heqaretan de reyna mojna. Ma sey şarê kurd tu wext vera netewêka bîne heqaret nêkerdo, ma tu wext kîndarî û nefretê nêmojnayo. Ewro şexsê Leyla Zana de ke kesêka yena naskerdene, no ame kerdene la no heqaret vera ma hemînan ame kerdene. Ma nê heqeretî seke ma rê ameyo kerdene, vînenê. Ma nê heqaretê terefgiran şermezar kenê. Spor çîyêko cîya yo. Spor qadêka dostanî, dîyalog û tehemulê hemverê yewbînan o. Spor qada ronayîşê têkilî ya. Şuxulnayîşê sporî yê bi nê hewayî cayê xemgînî yo. No nêyeno qebulkerdene.”
Eren: Wazenê şexsê Leyla Zana de zerar bidê prosesî
Serekê Rayberîya Kulubê Amedsporî Nahît Erenî derheqê na bebete de dîyar kerd ke reyna seha de vera şarê kurdî vatişê nefretî ameyê kerdene û vat: “Leyla Zana sîyasetê kurdî de xeylê wezîfeyanê muhîm de ca girewto. Seba ke meseleyê kurdî bi rayîrê aştî bêro çareserkerdene, têgêrena. Ewro seha de vatişê cinsîyetperestî vera Leyla Zana ameyê kerdene. Nê sloganî cinsîyetperestî demêko balkêşî de ameyê kerdene. Nê terefgiranê taximî verê zî sembolê demanê tarî yê ‘Torosanê sipî û kiştox Yeşîlî’ akerdbî. Ma vînenê ke tayê grûbî wazenê vatîşanê verênan reyna gandar bikerê. Ganî ma vera têgêrayîşanê provakatîf haydar bibê. Tirkîya de ma zereyê prosesêko muhîm de yê.”
TJA: Vera nasnameyê cinîyanê kurd heqaret ame kerdene
Aktîvîstan Têgêrayîşê Cinîyanê Azad (TJA) Hulya Alokmen zî vera heqaretanê ke Leyla Zanan rê ameyê kerdene, nêrazîbîyayîş mojna û vat: “Nê heqaretan tesîrêko gird ma ser o kerd. Zîhnîyeto camêrd reyna xo stadêkî de mojna. Çi wext behsê aştî û çareserî bêro kerdene, ma vînenê ke tayê hetî wazenê netewan yewbînan rê bidê şiknayene û qirkerdene. No zî zîhnîyetê camêrdîye ra yeno. Wazenê nê çîyan her tim bedenê cinîyan ser o bikerê. No hêriş şexsê rêzdar Leyla Zana de vera heme cinîyanê kurd ame kerdene. No hedîseyêko rêze ra nîyo. Leyla Zana cinîyêka kurd a, erjê kurdîtîye û şarê kurdî ya. Ma sey TJA nê heqaretanê lêminan şermezar kenê.”
Baroya Amedê: Wa ê kesî bêrê cezakerdene
Maçê Somaspor û Bursaporî de terefgiranê Bursaporî bi hewayêko organîze, sîyasetmedara namdar a kurd birêz Leyla Zana rê heqaret kerd. Aye tehdît kerd. Sucê nefretî vera Leyla Zana ameyê kerdene. Ma derheqê nê terefgiran de bi sebebê tehdîdî, sucê nefretî û çîyê ke kerdê, cipersayîş û dewa akerê. Ma sey Baroyê Amedî nê gazinameyê xo û hedîseyî taqîb bikerê. Ez reyna ê kesan şermezar kena. Kesê ke berpirsîyar ê wa bêrê cezakerdene.”
