Endamê Heyetê Rayberdişî yê Hemserekîya PYD’yî Aldar Xelîlî va: ‘’Ma sîstemê adem-î merkezî tena seba kurdan ney seba pêro Sûrîye wazenê.’’
Konferansê Tewirê Hemparî û Yewîya Neteweyî yê Rojawanî yê 16ê Nîsane ra dima bire dîyabî ke seba pêvînayîşanê bi îdareyê Şamî heyetêk bêro ronayene. Heyet de ê PYD, ENKS, Îdareyê Xoserî zî tede temsîlkarê partî û dezgehan ca gênê. Endamê heyetî ra Endamê Heyetê Rayberdişî yê Hemserekîya PYDyî Aldar Xelîlî ajansê ANF’î rê qisey kerd.
Aldar Xelîlî da zanayene ke Konferansê Tewirê Hemparî ra dima belgeya serê fikranê kurdan amebî tesdîqkerdene û va: ‘’Erkê heyetê ma o yo ke wayîrê na belge vejîyo û wayîrê waştişanê kurdanê Sûrîye vejîyo. Heyet de temsîlkarê 20-25 partîyan û têgêrayîşanê cinîyan est ê. Heyet de bi temamî 10 endamî est ê. Ma kenê ke Rojawanî asta neteweyî û mîyanneteweyîye de temsîl bikerê. Ma bi dîqatî têgêrenê; çunke xeletîyêka nê heyetî do tesîrê zaf çîyan bikera. Heyet tena Îdareyê Şamî de ney pêro beşanê Sûrîye de temasan keno. Çunke tena Rojawan de ney waranê Sûrîye yê sey Hama, Humus, Lazkîye, Şam de zî kurdî ciwîyenê.
Heyet çend rojî verê cû şibi pêvînayîşê Hukmatê Şamî. Roşanî ra pey ancî temasî do bêrê kerdene. La ma dî ke ganî tayê babetî hetê pisporanê a babete ra bêrê ercnayene. Mîsal ganî asayîş hetê temsîlkaranê hêzanê asayîşî ra bêro qalkerdene.’’
Xelîlî îfade kerd ke belgeya Konferansê Tewirî îdareyê Sûrîye ser o zî tewir mojnayo û wina domna: ‘’Xora Sûrîye de tena kurdî ney elewî, durzî, erebî, asûrî-sûryanî, misilmanî, êzidîyî ûsn. zî ciwîyenê. MA wazenê ke Sûrîye seba her kesî demokratîk biba. Ma vanê ke ganî Sûrîye bi sîstemê adem-î merkezî (sîstemê îdareyanê herêmîyan) bêra îdarekerdene.
Ma îdareyê dewleta neteweyîye yanî sîstemê îdareyê merkezî nêwazenê. Dewleta neteweyîye şer, kaos, pêkewtiş û dejî ra ber çîyêk nêda şarê ma. Ma sîstemê adem-î merkezî tena seba kurdan ney seba pêro Sûrîye wazenê. Ganî Sûrîyeya demokratîke bêra ronayene, kurdkî biba ziwanê perwerdeyî, kulturê kurdan bipawîyo. Yanî kurdî ganî bibê hemwelatîyê têdûştî. Sîstemê adem-î merkezî tena seba kurdan ney seba şar û bawerîyanê Sûrîye sîstemêko tewr raşt o.’’
