Lajê Ocaxa Pîr Sewdîn Alî Doganî vengdayîşê Rayberê Şarê Kurdî Abdullah Ocalanî erjna û vat: “Îtîqad û kulturê ma de dejnayîş, kiştiş, gonî rişnayîş neheqî ya. Qewmê her tim hetê pêkerdişî de yo.”
Rayberê Şarê Kurdî Abdullah Ocalanî 27ê sibate de “Vengdayîşê Aştî û Komelo Demokratîk” kerdbi. No vengdayîş dinya de gulbang da. Sazî û komelî, şarê kurdî û dostê ci paştî daye no vengdayîşo tarixî. Lajê Ocaxa Pîr Sewdîn Alî Doganê ke Dêrsim de ciwîyeno, ajansê ma (AW) rê qisey kerd. Alî Dogan seba vengdayîşê Rayberê Şarê Kurdî Abdullah Ocalanî zerrîweşîya xo ard ziwan û wina vat: “Îtîqad û kulturê ma de dejnayîş, kiştiş, gonî rişnayîş neheqî ya. Qomê her tim hetê pêkerdişî de yo.”
‘Qomê ma her tim hetê pêkerdişî de yo’
Alî Dogan aşitî û seyyewbînî kulturê Dêrsimî ra gîrêdano û wina vano: “Seba Dêrsimî şarê ma vatêne se? Vatêne cayê ewlîyayan, nîşangeyan, dara ûlî û kehenan. Vatêne cayê Xizirî. Nê cayî de şarî bi îtîqat, kultur û bawerîya xo weşîye ciwîyayêne. Behsê çîyanê verênan qet mekê. Çend serrî yo ke ne zîyareta ma mende ne dara ûlîya ma mende, ne kehenîya ma mende û ne zî ewlîyayê ma mendê. Heme çîyê ma bêwayîr mend û şî. Dewî veng û varit mendê û tede keyeyî nêmendê. Cayê ma dajêko giran ant. Tena şarê ma nêant, ewlîyayanê ma, zîyaranê ma, dar û beranê ma zî ant. Qomê ma ame talankerdene.
Nika zî qala pêkerdişî yena kerdene. Vanê dewamkerdişê nê şerî baş nîyo, wa bêro vindarnayene. Xora îtîqad û kulturê ma de dejnayîş, kiştiş, gonî rişnayîş neheqî ya, nêyenê qebulkerdene. Qewmê ma her tim hetê pêkerdişî de yê. Pêkerdiş, pêameyîş…Her kes pê ziwanê xo, bawerîya xo û îtîqadê xo cuya xo bidomno, zaf baş o. Wa no bikewo mîyanê qanûnan.”
‘Ma zerrîya xo de seba aştî dua kenê’
Alî Dogan wina dewam kerd: “Qomê ma bîyo nêbîyo elewî yo. Heta darbeya Kenan Evrenî ya 80î welatê ma de camî çin bî. 70-80 hebî camîyî bi zor ardî viraştê. Ez ê ke şonê camî îtîqad û bawerîya înan ra çîyêk nêvana. Nika ê camîyî heme veng ê. Heyf nîyo!
Vateyê mi o yo ke tayê dewê ma û tayê qezayê ma se ra se elewî yê, ti çira yenê tîya de camî virazenê. Pî û kalê ma kes nêşîyo camî. Şonê zîyaretan, şonê ewlîyayan, weşîya ma naye bîye.
Ma zerrîya xo de seba aştî dua kenê. Ma wazenê pêkerdiş bibo. Wa lejêko ameyo kerdene pê wa û birayî pê îqrarî bêrê hewanayene. Îtîqadê ma de demo ke mabênê di hetan de şer bibo, merdim dekewtêne mabênê înan û ê ardêne têhet û mabênê înan de îqrarî viraştêne. Xirabî û şer orte ra hewanayêne û her di hetan pêkerdêne.”
‘Cayo ke tede neheqî est a uca de Heq çin o’
Alî Dogan vate û waştişê xo wina domnayê: “Nika ma wazenê herdi hetî bêrê têhet û ê lejî vindarnê. Wa heqanê yewbînan bişinasnê. Pêameyîş bi yew hetî nêbeno, ganî herdi hetî bibê. Ganî herdi hetê bêrê têhet û qanûnan virazê. Qanûnê rindê. Wa neheqî tede çin ba. No waştiş û omidê ma yo. Îtîqadê ma de cuya pî û kalanê ma de yeno zanayene ke eke pêkerdiş est bo, ganî neheqî çin ba. Heq yew o. Cayo ke neheqî tede est a, uca de Heq çin o. Heq wa û birayîye, îqrarî dayo. Wa û birayî çi ya? Naskerdişê yewbînan o. Naskerdişê îtîqat, ziwan û kulturê yewbînan o. Tewr zaf lazimtîya ma bi wa û birayî est a. Senî ke erd bê varanî bimano, wazeno varan bivaro, rehmetê Heqî zî wazeno ey rê rehmet bivarno. Qomê ma rê zî hende wa û birayî û aştî lazim o. Eke wa û birayî çîyêko weş ano meydanî o wext çi bikewo milê ma ser o, ma amade yê. Ma paştî danê û hêzê xo zî tewrê ci kenê. Wa û birayî seba lazim o. Birayê bi yew hetî nêbena. Sey misaîbtîya ma elewîyan parekerdiş û pîya rayîrî ra şîyayîş o.”
