Ciwanê kurdî zaf bajaranê Almanya de seba Rojawanî payan ser o yê. Çalakîyan de xoverdayîşê Rojawanî ame selamkerdene.
Çeteyê HTŞ, SMO, û DAÎŞ’î bi piştîdayîşê Tirkîya hêrişê Kobanê kenê. Şervanê YPG-YPJ û HSD’yî zî bi hewayêko pêt û meşrû cewabê hêrişan danê. Çar parçeyanê Kurdîstanî û dîaspora de kurdî seba ke piştî bidê Rojawanî vejîyayî waran.
Nurnberg
Nurnberg de ciwanî kewtî mîyanê merkezê partîya îqtîdarî ya SDP’yî. Ciwanan çalakîya “Die In” kerd û vat: “Şarê Rojawanî vera DAÎŞ’î xover dano û serkewtişanê şorişî paweno. La sîyasetmedarê almanî bêveng ê. Ma naye protesto kenê. Kobanê hêvîya ma ya.”
Gottingen
Gottingen de ciwanan merkezê bajarî de stand rona û şarê bajarî derheqê hêrişanê vera Rojawanî de agahdar kerd. Ciwanan vat: “Têkoşînê Rojawanî têkoşînê ma yo zî û azadîya Rojawanî azadîya ma ya!”
Koln
Koln de wendekarî kewtî mîyanê unîversîteye û wextê derse de wendekaran reyde Rojawan ser o nîqaş kerd.
Çalakîya leqnayîşê pankartî
Hewtayê çalakîyan de seba Rojawanî Kassel, Mannheim, Kiel, Stuttgart, Duîsburgê Almanya û Zurîxê Swîsre de pankartî leqîyayî. Ciwanan vat: “Ma dewletanê mîyanneteweyîyan ra bawer nêkenê. Ma do cehd bikê ke konfederalîzma demokratîke tîya Almanya de bêro viraştene.”
Rayîrşîyayîşê girseyan
Stuttgart û Gostenhofî de rayîrşîyayîşî ameyî viraştene. Ciwanê ke beşdar bîyî vat: “Wa her kes beşdarê xoverdayîşî bibo. Dişmenê Rojawanî Almanya de est ê ke nê şerî germ kenê. Ganî ma vera înan têkoşîn bikerê.”
Munîh
Munîh de ciwanan vera şîrketê Hensoldtî çalakîye kerde û vat: “Ma wazenê bale biancê rolê çekanê almanan ê nê şerî ser o.”
Koblenz
Koblenzî de tayê wesayîtê şîrketê Thalesî ameyî veşnayene. Ciwanan vat: “Thales şîrketê çekan ê 8. ê dinya yo û artêşa tirke teknolojîya înan şuxulnena. Ma heme hêrişanê vera Rojawanî şermizar kenê.”
