Tirkîya de zî derheqê Çakasî de bi îdîaya endamîya rêxistine dewa amebî akerdene.
Avukatê Çakasî Dr. Björn Elberlingî da zanayene ke Tirkîya de bi na îdia çew bi hawayêkê edîlî nêno muhakemekerdene û vat: “Kesê ke Almanya de endamîya PKK’yî ra hukm diyabi înan verê cû teslîmê Tirkîya nêameybî kerdene.”
Avûkatî da zanayene ke Çakasî seba bextwaştişî muracat kerdo la Buroyê Îflah û Koçî yê Federalî (BAMF) waştiş red kerdo. Çakasî redî rê îtîraz kerdo û pawitişo ecil waşt.
Mehkemeya Îdarî ya Luneburgî 11ê hezîrana 2025î de no waştiş zî red kerd. Avûkatî îtîraz kerd û roniştiş waşt. Tarîxê roniştişî 8ê elule yo.
La goreyê avûkatî Mehkemeya Almanya wazena ke nê tarîxî ra ver Çakas teslîmê Tirkîya bikera.
Avûkatî vat: “3yê temmuze de Serdozgerîya Celle bire daye ke eke Çakas bêro sînorteberkerdene înfazê ceza nêara ca. Yanî tehlûke cidî yo ke Çakas teslîmê Tirkîya do bêro kerdene. Beno ke nişka ra Zîndanê Uelzenî ra bêro girewtene û bierşawîyo Turkîya.”
