TJA do 28-29 gulane de Amed de Konferanso 1. yê Parlamenteranê Cinîyan ê Kurdan organîze bikero. Çaglar Demîrel a TJA’yî va ke ê do seba awankerdişê komelo demokratîk hewl bidê ke xeta têkoşînê hempar awan bikerê.
28-29 gulane Amed de bi rayberîya Hereketê Cinîyan ê Azadî (TJA) û bi sloganî “Ma sîyaseto demokratîk bikerê, komelo demokratîk awan bikerê” Konferanso 1. yê Parlamenteranê Cinîyan ê Kurdan do bêro organîzekerdene. Yeno vajene ke hetê heme hetanî Kurdîstan, Iraq û welatanê Ewropayî ra zî parlamenterî bêrî û yê nika do beşdarê konferansî bibê. Êyê ke nêyenê zî do bi telekonferansî beşdar bibê.
Çaglar Demîrel a TJA’yî ke xebatanê amadekarîya konferansî de ca gêna, ajansê Mezopotamya (MA) rê dîyar kerd ke konferans encamê kedêka girde yo. Çaglar Demîrel dîyar kerd ke amancê înan ê konferansî ra o yo ke polîtîkayêka hempar dîyar bikerê û xebateyêka hempar ke do têkoşînê cinîyan vejo vernî û baş bimojno. Çaglar Demîrel dîyar kerd ke seba ke vera ferasetê netew-dewletî bi sîyaseto demokratîk cewab bidê û seba pratîzekerdişê têkoşînê hempar ê cinîyan, hewcedarî bi nê konferansî dîya û wina vat: “Rolêko muhîm û rîskê cinîyanê kurdan vera nê sîstemî est o. Rojava de şorişê cinî est o. No şoriş Rojhelatê Mîyanên û dinya de bîyo model. Amancê ma o yo ke ma vera şerî pîya derheqê sîyaseto demokratîk, komelo demokratîk, awankerdişê aştî û rayîr û metodanê nê de qisey bikerê. Ma wazenê xeta têkoşînê hempar ê vera nê sîstemî pîya dîyar bikerê. Ma cinîyê kurdî wazenê bikerê ke cinî mekanîzmayanê qerardayîşî de ca bigîrê û têkoşînêko hempar vera zîhnîyetê camêrdî awan bikerê.”
‘Zaf welatan ra do parlamenterî beşdar bibê’
Çaglar Demîrel da zanayene ke heme hetanê Kurdîstan û welatanê sey Danîmarka, Hollanda, Swîsre, Almanya û ûsn. ra do parlamenterê kurdî beşdarê konferansî bibê û wina vat: “Riyê qedexeyanê Tirkîya ra do nêeşkê bi hewayêko fîzîkî beşdar bibê. Başûr û Îraq ra nêzdî 60 parlamenterî do beşdar bibê. Parlamenterê verênî zî do beşdar bibê. Leyla Zana ra heta parlamenterî ke sîyaseto demokratîk de ca girewto, beşdar bibê. Parlamenterî ke surgun de yî, do ê zî beşdar bibê. Ê zî do onlîne beşdar bibê.”
‘Ma do hewl bidê xeta têkoşîno hempar awan bikerê’
Çaglar Demîrel va ke ê do hewl bidê ke nîqaşanê xo xetêka têkoşîno hempar de dîyar bikerê û wina dewam kerd: “Reyna goreyê ma do seba meseleyê yewbîyayîşê neteweyî yê cinîyanê kurdan zî bibo gamêko baş. Do cinîyê kurdî rayberîya yewbîyayîşê neteweyî bikerê. Reyna atolyeyê ma do est bî.”
Çaglar Demîrel derheqê vengdayîşê “Aştî û Komelo Demokratîk” ê Rayberê Şarê Kurdî Abdullah Ocalan de nê çîyî zî îfade kerdî: “Do fikro hempar, pratîko hempar û xeta têkoşînê hempar zî konferansî de bêrê dîyarkerdene. Yewîya rojevê ma zî o yo ke do sîyaseto demokratîk tîya ra pey ra senî bikewo merîyet. Derheqê şeklê awankerdişê komelê demokratîkî de ma do hewl bidê xetêka têkoşîno hempar awan bikerê.”
‘Do tecrubeyî bêrê parekerdene’
Dewamê qiseykerdişê xo de Çaglar Demîrel va ke do roja ewile cinî tecrubeyanê xo pare bikerê û wina qisey kerd: “Do roja dîyin de zî atolyeyî bêrê organîzekerdene. Encamê nîqaşan de do encamname bêro amadekerdene.”
‘Ma do pîya xurt bikerê’
Çaglar Demîrel va ke ê do seba cinîyanê kurdan Meclîsî de têkoşînêko hempar bidê destpêkerdene û rêxistinîya nê bikerê. Çaglar Demîrel qiseykerdişê xo wina qedêna: “Konferansî de do hedefî zî bêrê zelalkerdene. Serdemo de ke netew-dewlet cinîyan çin hesabneno, nasname, ziwan û kulturê kurdan înkar kenê, ma do yekbîyayîşê xo û ziwan, kultur û nasnameyê xo senî bidê ciwîyayene, ma do nê dîyar bikerê. Ma do bi beşdarîya heme embazanê cinîyan, encamnameyê xo raya pêroyî reyde pare bikerê.”
