MKG û DFG’yî seba mamosteyê Çapemenîya Azade rojnameger Huseyîn Aykolî awanîya DFG’yî ya Amedî de tezîye ronaye û xeylê sîyasetmedar û rojnamegeran tezîye zîyaret kerd.
Komela Rojnamegeranê Dîcle Firatî (DFG) û Komela Rojnamegeranê Cinî ya Mezopotamya (MKG) seba mamosteyê Çapemenîya Azade rojnameger û nuştox Huseyîn Aykolî ke cuya xo vîndî kerdbî, awanîya DFG’yî ya semtê Ofîsî yê Amedî de tezîye ronaye. Tezîye de resmê Huseyîn Aykolî ameyê aliqnayene. Wendekarê Huseyîn Aykolî ke rayber û endamê DFG û MKG’yî kesê ke ameyêne tezîye pêşwazî kenê. Cayê tezîye de defterê vîrameyîşî ame ronayene û kesê ke ameyêne tezîye derheqê Huseyîn Aykolî de fikir û hisê xo nuştêne.
Hemserekê Pêroyî yê Partîya Herêman a Demokratîke (DBP) Keskîn Bayindir û Çîgdem Kiliçgun Uçar, Hemverfek Kongreya Demokratîke ya Şaran (HDK) Meral Daniş Beştaş, Hemşaredarê Amedî yê Şaristanê Girdî Serra Bucak û Dogan Hatun, endamê partiyanê siyasî, temsîlkarê sazgehanê sivîl û xeylê kesan tezîye zîyaret kerd. Meral Daniş Beştaş û Çigdem Kiliçgun Uçar tezîye de qisey kerd û Çapemenîya Azade rê serweşîye waşte.
