Endama Komîteyê Amadekar a Newroza Amedî Sultan Yaray da zanayene ke xebatê seba amadekarîya Newroza tarixî dewam kenê û vat: “Amed seba Newroza tarixî amade yo.”
Newroza emserrî bi sloganî “Vengdayîşo Aştî û Komelo Demokratîk” ê Rayberê Şarê Kurdî Abdullah Ocalanî bi sloganî “Raybero Azad, Komelo Demokratîk” yena kerdene. Pîrozbayîyê Newroze bi çoş û kelecanêko pîl dewam kenê. Adir û pîrozbayîyê Newroze heme cayê Kurdîstanî de vila bîyê. Nê merkezanê pîrozbayîyan ra yew ke çimê heme raya pêroyî ser o yê; Amed o. Yeno. Zanayene ke mîlyonêk kesan ra vêşêr kesî tewrê Newroza Amedî bibê.
Mêmanê ameyê silaynayene
Komîteyê Amadekar ê Newroza Amedî seba mêmanan çar hetê Kurdîstan û teberî welatî ra silaynameyê Newroze ameyê erşawitene. Reyna yeno pawitene ke xeylê sîyasetmedar û rewşenbîrî sey mêman û protokol tewrê pîrozbayî bibê. Heto bînî ra ame zanayene ke nêzdîyê 600 rojnamegerî seba taqîbkerdişê Newroza Amedî seba akredîtasyonî DEM Partî rê sere pirodayo.
Rojane amadekarîyê Qada Newroze ya qezaya Rêzanî dewam kenê. Amaderîyê qade ver bi qedîyayîşî yê û Amed xo seba rojêka newa û tarixî rê amade keno.
‘Amed şaristanê Newroze yo’
Endama Komîteyê Amadekar ê Newroza Amedî û Hemsereka Rêxistîna Partîya Herêmanê Demokratîk (DBP) a Amedî Sultan Yaray derheqê xebatanê amadekarîya Newroze qisey kerd û şarê Kurdîstanî rê vengdayîşê tewrbîyayîşê pîrozbayîya Newroza Amedî kerd.
Sultan Yaray ard ziwan ke verê heme çîyê a Roşanê Newroze heme kesanê aştîwaz, şarananê bindest rê pîroz kerd û vat: “Ma sey komîteyê amadekar xebatanê xo domnenê. Ma heta nika bi seyan dewe û taxî zîyaret kerdê. Ma vilakerî vila kerdê, ma xeylê cayê şaristanî xemilnayê û Amed kerd şaristanê Newroze. Qada Newroze de zî amadekarîyê ma temam benê. Seba ewleyî zî ma bi seyan kesî wezîfedar kerdê. Ewro zî do erebeyê anonsî do mîyanê şaristanî de bigeyrê û vengda şarî bidê ke bêrê Newroze. Dewe û taxan de, şaristanê nêzdîyê Amedî de rêxistinê öa do erebeyan eyar bikerê seba ke welatijî bieşkê bêrê Newroze.”
‘Şar tewr zaf mesajê Abdullah Ocalanî meraq keno’
Sultan Yaray da zanayene ke xebatanê Newroza emserrî de şar tew zaf perseno ka mesaj yan zî vîdeoyê Rayberê Şarê Kurdî Abdulah Ocalanî est o yan ney û wina dewam kerd: “Şar tewr zaf mesajê birêz Abdullah Ocalanî meraq keno. Ma xeylê kesî wazenê ke vîdeoyê Rayberê Şarê Kurdî Abdullah Ocalanî est bo, heta xeylê kesî vanê ganî êdî bi hewayêko fîzîkî azad bibo û tewrê Newroze bibo. Vengdayîşê Rayberê Şarê Kurdî Abdullah Ocalanî kelacanêko pîl viraşto. Ez bawer a do tewrbîyayîş zî goreyê ey vêş bibo. Ma na Newroze kawayê Hmdem û birêz Abdullah Ocalanê ke mîmarî aştî yê, înan rê pîroz kenê. Ma silamanê xo ey rê erşawenê. No rayîro ke nîşanê ma dayo, rayîro tewr demokratîk û adil o. O semedî ra zî waştişê ma û yê şarî yo tewr pîl o yo ke êdî no tecrîd wirzo û birêz Abdullah Ocalan bi hewayêko fîzîkî azad bibo.”
‘Bêrê ma pîya adirê azadîye û aştî geş bikerê’
Sultan Yaray tewr peyên seba tewrbîyayîşê Newroza tarixî vengda û wina vat: “Vengdayîşê ma şarê ma rê o yo ke her kes bi ruhê neteweyî, bi cil û belganê xo yê neteweyî qada Newroze pirr bikerê. Heme kesê ke vanê bindestî rê êdî bes o, çareserî geyrenê, bêrê ma pîya adirê azadîye û aştî geş bikerê û vengê xo biresnê dinya.”
