Seba mîtînganê 8ê Adare Amed û Dêrsim de do bêrê viraştene cinîyan vengdayîşê beşdarî kerd û vat: “Ma Heqan û cuya xo ro fekveranêdanê”
Roja 8ê Adare yê Dinya Amed de bi şîarê “Bi xoverdayîş azad benê, komelo demokratîk awan kenê” mîtîng virazênê. Cinî bi rojano ke waran ra çalakîyan de yê seba fînalê 8ê Adare roja yewşeme do Meydanê Îstasyone de mîtîng virazê. Mîtîng de Têgêrayîşî Cinîyanê Azad (TJA) ra Sebahat Tuncel û Hemsereka Pêroyî yê Partîya Herêmanê Demokratîk (DBP) Çîgdem Kiliçgun Uçar do qisey bikerê. Hunermende Beser Şahin do sehne de ca bigîro. Çarçewayê 8ê Adare Dêrsim de rayîrşîyayîşê Kuçeyê Hunerî ra dima do Meydanê Seyîd Rizayî de mîtîng virazîyo.
Cinîyanê Amed û Dêrsimî seba mîtîngan vengdayîşê beşdarîye kerd.
Endama TJA’yî Didem Yilmaz vat ke şîdetê vera cinîyan ser o seba ke cezayê girdî çinîyê vernîya şîdetî abeno, sey her serre emser zî ma do tewrê 8ê Adare bibê. Ma do heqê cuye bipawê û dimayê têduştî de bê, seba girdkerdişê paştîdayene vengadyîşê beşdarîye 8ê Adare kerd.
Vengdayîşê têkoşînê pêro pîya
Evîn Ezen Alp, vat ke ma her roj xeberêka newîye yê kiştişê cinîyan gênê, vera naye hewceyî bi xurtkerdişê paştîdayene est a. Hêvîya xo ma vîndî nêkenê, xoverdayîşê xo ma do dewam bikerê.
Müzzeyen Sevim, bale ante şerê Rojhelatê Mîyanên ser û vat bi şîarê ‘Cinî Cuye Azadî‘ ganî cinî vera nê şerî vejîyê. Endî wextê têduştî û azadîya. Ganî ma heme rojanê serre açarnê 8ê Adare.
Jana Dila û Zemzem Fedai vengdayîşê mîtîngê 8ê Adare Meydanê Îstasyonê saete 11:00 de do bêro viraştene kerd.
Aktîvîsta TJA Ayla Akat Ata, Cagira Hemserekê Pêroyî yê DEM Partî Yuksel Mutlu, Aktîvîsta TJA Salîha Peker, Hemverfeka komîsyonê ziwan, kultur û hunerî yê DEM Partî Cemîle Turhalli, Sekreteryaya platformê yewîya cinîyan ê kurdî yê Vakurî ra Filiz Buluttekîn, muhîmîya 8ê adare îşaret kerd û heme cinî dawetê mîtîngê sibayî kerdî.
Vengdayîşê mîtîngê Dêrsimî
Cinî Dêrsim de zî bi şîara “Seba ewro, siba û ameyox; seba heqan û cuya ma, seba aştî, seba azadî, seba ma vajê kedwerî rê ney” do waran ra bê. Platformê cinîyan ê Dêrsimî 8ê adare saete 12:30 de Kuçeyê Hunerî de do bêrê têhet. Cinî do tîya ra ver bi Meydanê Seyîd Rizayî badê rayîrşîyayîşî mîtîng virazê.
Endamê Platformê Cinîyan ê Dêrsimî Nurşat Yeşile vat ke nê heqî bi lutfê îktîdaran nêdiyayê, la bi têkoşînê cinîyan yê bi serran dest girewtê, heqê nefeqa, Kontratê Stenbolî û sey qanûnê humara 6284 destkewteyî kerdê hedefê xo. Nurşat Yeşil, vera bê cezayî û zêdebîyayîşê şîdetî, “Ma heqan û cuya xo ra fekveranêdanê” vat û cinî dawetê vejîyayîşê waran kerdî.
