Hêrişê mabênê Îsraîlî û Îranî dewam kenê. Îsraîlî bi 40 teyarayan da bi desan hedefan ro. Mîyanê nê hedefan de merkezê nuklerî zî est ê. Yeno îdîakerdene ke Amerîka planê hêrişê vera Îranî tesdîq kerdo.
Artêşa Îsraîlî şewdirê pancşemeyî de eşkerayîyêke daye û dîyar kerd ke bi 40 teyarayanê şerî bi desan hedefî Tehran û dormeyê ci de ameyê pirodayene. Îsraîlî pare kerd ke înan dayo santralê nuklerî yê Arakî û tesîsêkê Natanzî ro.
Goreyê eşkerayîye sîstemê pawitişê hewayî, berardişê fuzeyan, bataryayê pawitişê hewayî yê rejîmê Îranî, merkezê depokerdişê fuzeyan, radar û wesayîtî hewayî ra ameyê îmhakerdene.
Serê sibayî şaristananê Tel Avîv û Qudusî yê Îsraîlî ra vengê teqayîşanê pîlan ameyî. Goreyê medyaya Îsraîlî netîceya hêrişanê Îranî de Holon de bi desan kesî birîndar bîyî, Ramat Gan de 16 kesî, Soroka de kesêk birîndar bîyî, Soroka de nêweşxaneyêkî zerar dî. Wezîrîya Weşîye vera ney nêrazîbîyayîşê xo mojna û vat ke no ‘sûcê şerî’ yo.
Goreyê eşkerayîya Îranî netîceya bombardumanê Îsraîlî de Îran de tewr tay 224 kesan dinyaya xo bedilnaya, tewr tay hezar kesî zî birîndar bîyê.
Ajansê Xeberan a Associated Pressî doneyê rêxistina “Pawitoxanê Heqanê Merdiman’’ weşanayê ke merkezê ci Washington de yo û pare kerd ke hêrişanê Îsraîlî de Îran de 639 kesî merdê, 1329 kesî birîndar bîyê.
Goreyê medyaya Îsraîlî hêrişanê Îranî de tewr tay 24 kesî merdê û 592 kesî zî birîndar bîyê.
Ajansanê Xeberan ê Îranî îfade kerd ke şaristanê Meşhedî yê Îranî de 18 ‘ajanê dişmenî’ tepişîyayê.
Goreyê Wall Street Journalî Donald Trump şêwirmendanê xo rê vato ke Amerîka planê hêrişê vera Îranî tesdîq kerdo la seba ke bivîna hela Tehran do bernameyê nuklerî ra fek vera dayo yan ney planî nika nêana ca. Selahîyetdarêkê Amerîka AFPyî rê vat: ‘’Pêro alternatîfî masa ser de yê.’’
