Temsîlkaro Taybet ê Serekê DYA’yî yê Rojhelatê Mîyanênî Steve Witkoff kombîyayîşê nukleerî yê Cenevre yo hîrêyînî ra ver vat eke peymanêka nukleerî Îranî reyde virazîya ganî demkî nê, daîmî û hîra ba.
Goreyê agahîyanê xeberêka Reûtersî berpirsêko payeberz ê Amerîkayî ke nêwaşt nameyê xo eşkera bikero, dîyar kerd ke Witkoff vato ke eke peymanêka newe bêra viraştene do sey peymananê verênan nêba. Witkoff wazeno peymana ke do bêra viraştene demkî nêba. Goreyê waştişanê Amerîkayî programê nukleer ê Îranî seba çimdarîya pisporanê mîyanneteweyî akerde bo û bê sînor bo û her wext bi ûsul bêro taqîbkerdene. Sewbîna zî dîyar kerd ke Amerîka wazeno pêvînayîşê peymane tena zengînkerdiş û vindarnayîşê uranyûmî ser o nêbo, Amerîka wazeno muzakereyanê peymane de babeta sînorkerdişê fuzeyan û birnayîşê paştîdayîşê seba mîlîsanê teberî zî bêrê rojev.
Rayberîya Trumpî peymananê nukleerî yê verên ê biwext û krîteranê sînorkerdeyan êdî qebul nêkena û dîyar kenê ke nê wextê dîyarkerdeyî û krîterê ke sey şert ameyê ronayene, îmkanan virazenê ke ameyoxî de Îran uranyûmî zengîn bikero û bibo wayîrê çekê atomî.
Her çend raporê têkilîyanê nerasterast yê mabênê Washington û Tehranî ser o hetê komelê mîyannetweyî ra nêzdî ra yenê taqîpkerdene zî, heta nika derheqê pêşnîyaznameyê peymane ya fermî û hîra de eşkerayî nêdaya.
