Endama Koordînasyonê PAJK’yî Ayten Dêrsime vat ke mesajê Rayber Apoyî yê 8ê Adare seba înan dîyarîyêk bî û vat: “Rayberîye rolê pêşengîya haştîye da cinîyan. Çike berpirsîyarîya vurnayîşê na dinya milanê cinîyan ser o ya.”
Endama Koordînasyonê PAJK’î Ayten Dêrsime Medya Haber TV’yî de beşdarê programêko taybetî bîye û 8ê Adare, mesajê Rayber Apoyî yê Têgêrayîşê Cinîyan rê û hêrişanê Îranî ser o qisey kerd.
Dêrsime vat ke mesajê Rayber Apoyî yê 8ê Adare seba înan dîyarîyêk bî û vat: “Rayberîye seba cinîyan rolê pêşengtîya haştîye da. Çike berpirsîyarîya vurnayîşê na dinya milanê cinîyan ser o ya.” Dêrsime ard vîrî ke Rayber Apoyî Îmrali de 27 serran de asaretî de têkoşînê Têgêrayîşê Cinîyan hertim xorînêr kerd û bî roşnîya înan.
Dêrsime seba heme cinîyan Newroze pîroz kerd û vat: “Newroze ruhê xoverdayîşî yo, ruhê serewedartişî yo, ruhê şorişî yo. Bê guman no têkoşîn û no adir nêpeysêno. No adir gird bî û heme şarî, heme cinîyî û heme merdimanê birûmetan dormeyê xo de ard pêser.”
Derheqê şerê Amerîka û Îsraîlî yê Îranî de Dêrsime vat ke no şer tena Rojhelatê Mîyanênî ney, heme dinya eleqedar keno û cinîyî û qijî tewr zaf nê şerî ra tesîr gênê. Dêrsime dîyar kerd ke rejîmê molayan ganî bivurîyo la nê vurîyayîşî bi îradeyê şaranê Îranî û cinîyanê Îranî mumkun o. Bi mudaxelayê teberî ney. Dêrsime bale ante ke serewedartişê Jin Jiyan Azadîye nêqedîya û vat: “Amerîka û Îsraîl xelaskar nîyê, amancê înan hegemonî yo û no şer seba şarî vînkerdiş o.”
Dêrsime vat ke 8ê Adare bi xoverdayîşê cinîyan ameyo qezenckerdene û no mîras ganî hertim bêro wayîrvejîyayene. Dêrsime bale ante ke cinîyî ganî rêxistinbîyaye bibê û îfade kerd ke Rayberîye komûnê cinîyan ser o zaf vindert û vat: “Cinîyî xo bi xo rêxistin bikerê, xo bi xo bipawê û xo bi xo çareserîya xo bîyarê caardene. Kesêk seba cinîyan qerar nêdo, cinîyî ganî bi xo qerarê xo bidê.” Dêrsime vat ke komkiştişê cinîyan ewro zî dewam keno û vera normalîzekerdişê naye ganî heme rojî bibê roja têkoşînê cinîyan.
Dêrsime peynî de Newroze, ruhê prosesê Haştî û Komelê Demokratîkî reyde girê da û vat: “Heme cinîyî ganî bi rengê xo, bi vengê xo û bi îradeyê xo ya azadî waranê Newroze de bibê. Amancê ma azadbîyayîşê fîzîkî yê Rayberê ma yo. No têkoşîn do dewam bikero.”
