Parlamentera Dêrsimî ya DEM Partî Ayten Kordu, protestoyê wendekaran ke vera açarîyayîşê kitabxane û fakulteyanê Unîversîteya Munzurî seba awanîya hukmat û edlîye ameybî kerdene, berd rojevê Meclîsî.
Parlamentera Dêrsimî ya DEM Partî Ayten Kordu, derheqê cipersayîşanê ke vera wendekaranê Unîversîteya Munzurî ameyê kerdene, pêşnîyaznameyêkê persî da Meclîs. Kordu waşt ke cewabê persanê aye hetê Wezîrê Perwerdeyî yê Mîllî Yusuf Tekînî bêro dayene.
‘Protestoyê heqdar ê wendekaran cipersayîşan reyde nêvindenê’
Kordu dîyar kerd ke dima ke kampus de qerarê awanîya hukmat û edlîye ame dayene, wendekaran waştbi bi hewayêko aştîyane beyanatê çapemenî bidê û rayra şêrê, rastê mudaxeleyê polîsan ameyî. Kordu wina vat: “Unîversîte tena cayê perwerde û musnayîşî nîyê; ganî ê bibê cayê fîkrê rexneyî, azadîya îfadeyî û munaqeşeyê demokratîkî. Açarnayîşê unîversîteyan seba dezgehanê bînan, hîmê azadîya akademîke û heqê perwerdeyî yê teleban xirab keno.”
Persê ke Ayten Kordu waşt Yusuf Tekîn cewab bido wina yê:
- Kampusê Unîversîteya Munzurî de, pê kamcîn manayan cayê kitabxaneyî û fakulteyan seba awanîya hukmat û edlîye yenê şuxulnayene? Wexto ke no qerar ame girewtene, çira fikrê wendekaran û unîversîteyî nêame girewtene?
- Manayê huqûqî yê mudaxeleyê vera wendekaranê ke waştbi rayîrşîyayîşêko aştîyane waştibi bikerê, çi yo?
- Derheqê îdîayanê ke vanê ‘kampus de wezîfedarê çekdarî est ê û wazenê wendekaran reyde bikewê têkilî’ zanayîşê Wezaretî şima est o? Na babete de cipersayîşêk ameyo destpêkerdene?
- Cipersayîşê dîsîplînî yê ke vera 8 wendekaran ameyê destpêkerdene, pê kamcîn mana û mewzuatî ameyê kerdene?
- Seba pawitişê heqanê wendekeran ê sey azadîya îfadeyî û kombîyayîşî, polîtîkayê Wezaretê şima çi yê? Seba ke nê hedîseyî reyna nêbê, şima çi plan kenê?
- Kampusê unîversîteyan cayê xebata akademîkî yê. Açarnayîşê kampusî seba edlîye û dezgehanê asayîşî, çi tesîr azadîya akademîke û berardişê zanistî ser o keno; na babete de cigêrayîşêk ameyo kerdene?
Kordu dîyar kerd ke kampusê unîversîteyan eke sey dezgehanê asayîşî bêrê vurnayene, no wendekar û akademîsyenan ser o teda awan keno. Kordu vat ke no kerdiş vera prensîbanê dewleta huqûqî û komela demokratîkî yo.
