Tamer Tanrikûlû ke badê 32 serran Hepisxaneyê Aksaray ra ame veradayene Amed de bi girseyî ame pêşwazîkerdene.Tamer Tanrikulu vat: “Seba azadîya Serekî ma do têkoşînê xo bêvindertiş bidomnê.”
Pêşengîya MED TUHAD-FED’î de Tamer Tanrikûlû yê badê 32 serran Hepisxaneyê Aksaray ra ame veradayene, Amed de bi coşe û kêfweşî ame pêşwazîkerdene. Tamer Tanrikûlû ke sibata 1994î de amebî destbendkerdene, adara 1999î de cezaya muebedî seba ey ameye dayene. Tamer Tanrikûlû badê cezaya muebedî bi rêze hepisxaneyanê Bergama, Çankiri, Yozgat, Çewlig, Bursa û Elbistan û tewr peynî zî Hepisxaneyê Tîpê T’yî yê Aksaray de girewte mend. Cezaya ke Tamer Tanrikûlû rê ameybî ddayene 3ê sibate 2024î de qedîyaybî û ganî biameyêne veradayene. La heyetê Çimdarîye yê Hepisxaneyê Aksaray bi hewayêko kêfî veradayîşê Tamer Tanrikûlû di serrî taloq kerd.
‘Azadî bextewarîyêka gird a’
Tamer Tanrikûlû badê pêşwazî qisey kerd û wina vat: “Bêşik badê 32 serran, resayîşê îmkananê azadîye bextewarîyêka gird a. La mi heval û hogirê xo pey xo de verdayê. Zerrî û cîgera mi pey mi de mende. Naye ra hetêkê mi zî xemgîn o. Hêvî kena ke sere de Serek Apo û heme hevalê ke zindanan de yê bilez biresê azadîya fizîkî. Roja ke ma game eşta mîyanê têkoşînê, ma çi soz dayo şarê xo, heta nefesê xo yê peyênî ma do wayîrê sozê xo vejîyê. Serokatî rastî zî seba prosesêko newe da dest pêkerdene. No proses her wextî ra zêdeyêrî hem gureyê ma girantir keno, hem zî hayîdarîyêke girde wazeno. Ma her tim bi xoverdayîş resayê netîce. Na rey zî terba şarê xo ma do biresê netîce. Têkoşînê ke heta nika ameyê rayraberdene, nasnameyê şarê kurdî û estbîyayîşê şarê kurdî bi heme dinya da qebûlkerdene. Ewro ra tepîya proseso newe de têkoşînê prosesê neweyî do statûya şarê jurdî zî bi dinya bido qebûlkerdene. Ma na bawerî de yê û heta nefesê xo yê peyênî zî ma do pey serekê xo rayra şorê. Seba azadîya Serekî ma do têkoşînê xo bêvindertiş bidomnê.”
Badê qisey kerdene girseye bi sloganê “Bijî Serok Apo”, Şehîd namirin” û “Bê Serok jiyan nabe” berz kerd.
