Hemserekê Pêroyî yê DEM Partî Tuncer Bakirhanî vat: “Ê ke Gazze rê bermenê û pê hêrişê vera taxanê kurdan ê Helebî ben şa, dişmenê kurdan ê.”
Hemserekê Pêroyî yê DEM Partî Tuncer Bakirhanî meclîs de kombîyayîşê partîya xo yê hewteyanî de rojdem erjna. Bakirhanî hêrişê vera taxanê kurdan ê Helebî sey ceribnayîşê Helepçeyêkê neweyî pênas kerd û vat: “Heleb de yew servane bîna ra ameye wareştene. Ê ke vera nê bêveng mendî û ke paştî danê kesanê ke no wehşet kerd, mela rîyê roje mevînê.”
Bakirhanî nê vatî: “Nê des rojanê peyênan de çim û goşê ma pêrune taxanê Şêxmeqsûd û eşrefîye de bî. Gama ke dinya qala Venezuela û haydutanê Kayayîpan kerdêne, verê ma de Heleb de provayê qirkerdişî ame kerdene û dewam keno. Rejîmê Şamî û çeteyê ke dewleta tirke paştî dana ca wazenê karo ke DAÎŞ’î nimcet verda, temam bikerê. Taxanê kurdan ê Helebî de sîvîlî, cinî û domanî ameyî hedefgirewtene. Nêweşxane û îbadetxaneyî dîyayî bombayan ver. Taxî gerîyayî binê ablûqa,bi hezaran kesî bi rojan vêşan û têşan mendî. Grûbanê ke hêrişê nê wird taxan kerd, zîhnîyetê înan û dewamê wehşetê vera Enfal, Şingal û Kobanê yo. Heleb de yew servane bîna ra ameye wareştene. Ê ke vera nê bêveng medî û ke paştî danê kesanê ke no wehşet kerd, mela rîyê roje mevînê.
Bakirhani vistvîrî ke xeylê komelê mîyanneteweyî veng da, Neteweyanê Yewbîyayeyan, Amerîka, Yewîya Ewropa û xeylê welatanê Ewropa eşkerayîye dayî û vat vera nê Tirkîya eşkera paştî daye hukmatê Şamî. Bakirhanî no tewirê Tirkîya bi ziwanê tujî şermezar kerd û vat: “Bi mîlyonan kurdê ke Tirkîya de ciwîyenê nînan de bêbawerîye û şiknayîş ame afirnayene. Hêrişê ke Heleb ameyî kerdene têna hêrişê leşkerî nîyê. No provayê tesfîyekerdişê sîstematîkî û qirkerdişî yê vera kurdan o. Ê ke semedê Gazze hîsgêrîye mojnenê û vera hêrişanê Helebî bêveng ê, dirî yê. Ê ke Gazze rê bermenê û semedê Helebî çapikan kuwenê dişmenê kurdan ê.”
Bakirhanî vera hêrişan bale ante xoverdayîşê kurdan ser û vat: “Ameyoxê kurdan şarê Sûrîye û masayanê leyminan û bazarîye de ney, xoverdayîşê hemparî û yewîya demokratîke yê şaran do bêro nuştene. Ganî hêrişê Helebî cade bêrê vindarneye, ablûqa bêro wedaritene, korîdorê merdimî bêro akerdene, sîvîlî bêrê veradayene û hêrişî bi tewirê xoserî bêrê ciperdayene. Ma cayê şarê kurdî yê Helebî de yê. Ma do vera nê hêrişan bêveng memanê, çarçewaya haştîye, demokrasî ê seypêyî de têkoşîn bikerê.”
Bakirani bale ante protestoyanê Îranî ser û vat: “Îtîrazê şarî yê haştîyanê meşrû yê. Rejîm nêeşkeno pê zext û şîdetî payra bimano. Ameyoxê Rohelatê Mîyanênî bi demokrasî eşkeno bêro ronayene.”
Bakirhanî cewab da Rayberê MHP’yî Bahçelî û vat Heleb de heto ke şertê mutabaqatî nêardî ca îdareyê Şamî yo.
Bakirhani vist vîrî ke Rayber Apoyî reyde 40 rojî pêvînayîş nêameyo kerdene û vat seba ke bieşko rolê xo bîyaro ca ganî şertê resnayîşî yê azadî bêrê caarene.
Bakirhanî peynî qiseykerdişê xo de ard ziwan ke dişmenîya kurdan Tirkîya de helisnayîşo komelkî, feqîrîye û girêdayîya madeyî zêdînayî, semedê zemînê huqûqî de çareserkerdişê meseleya kurdan veng da û vat DEM Partî hetê çareser û haştîye de ya.
