Baroyê Amedî raporê xo yê bi nameyê “Derheqê Prosesê Aştîya Komelkî û Entegrasyonî de Fikr û Pêşnîyazê Huqûqî” bi kombîyayîşê çapemenî awanîya xo de eşkera kerd û waşt ke seba ke prosesê entegrasyonî domdare bibo, Komîsyonê Meclîsî fesihkerdişê PKK’yî tesbît bikero û PKK lîsteya terorî ra bêra vetene.
Baroyê Amedî raporê xo yê bi nameyê “Derheqê Prosesê Aştîya Komelkî û Entegrasyonî de Fikr û Pêşnîyazê Huqûqî” bi kombîyayîşê çapemenî awanîya xo de eşkera kerd. Metnê eşkerayî Cagira Serekê Baroyê Amedî Şîlan Çelîk wend.
Cagira Serekê Baroyî Şîlane Çelîk vat ke pêkewtişê çekdarî yê ke bi serranê dergan o dewam keno, sere de heqê cuye heme waranê heq û azadîyanê bingeyinan de binpaykerdişê giranî kerdî û seba aştîya domdare çarçeweya qanûnanê taybet ke vindarnayîşê pêkewtişê çekdarî bigîro binê temînatê huqûqî û entegrasyonê komelkî temîn bikero, lazim a.
Rapor binê 5 sernuşteyanê esasan de hazir bîyo: Prosesê entegrasyonê badê pêkewtişan, berpirsîyarîya cezayîye û çarçeweya destûrî, Qanûnê Têkoşînê Vera Terorî (TMK), pêşnîyazê rejîmê huqûqî yê taybetî û prosesê demokratîkbîyayîşî.
Raporî de ame vatene ke mekanîzmayê huqûqê cezayî yê nikayênî seba çareserîya pêkewtişan bes nîyê û ame pêşnîyazkerdene ke qanûnêko taybetî yê entegrasyonî ke bingeyê edaletê tamîrkerî ser o bo, bivejîyo. Baroyî waşt ke TMK bêro wedarnayene, badê fesihê rêxistine û veradayîşê çekan Meclîs na rewşe tesbît bikero û PKK lîsteya terorî ra bivejo.
Eynî wext de raporî de seba pawitişê heqanê sîyasî yê kesanê ke çekanê xo veradanê, entegrekerdişê mewzuatê caardişê cezayan standardê mîyanneteweyî yê “heqê hêvî” û ronayîşê komîsyonê raştîye, tamîrkerdişî û vîrê komelkî Meclîsî rê ameyê pêşnîyazkerdene.
