Mesûd Barzanî bi mesajêk paştî da mesajê Abdullah Ocalanî û vat: “Ma hêvî kenê ke mesajê Birêz Ocalanî bingeyê newe ra destpêkerdişê prosesê aştî awan bikero.” Qubat Talabanî zî vat: “Abdullah Ocalan reyna berê çareserî akerd.”
Serekê Partîya Demokratîk yê Kurdîstanî (PDK) Mesûd Barzanî mesajê tarixî yê Rayberê PKK’yî Abdullah Ocalanî ra pey ke hetê heyetê DEM Partî ra Stenbol de ame parekerdene, mesajêk da û paştîya xo ya seba prosesî mojna.
Mesajê Mesûd Barzanî wina yo: “Helwestê ma yo derheqê prosesê aştî û çareserî yê ke Tirkîya de yo, nêbedilîyayo. Bi heme hewl û derfetanê xo ma paştî danê nê prosesê aştî ke Tirkîya de yeno kerdene. Aştî yewin rayîrê çareserkedişê probleman o. Ma hêvîdar ê ke mesajê Birêz Ocalanî seba prosesê aştî bêro ca û bibo destpêkêk. Wa mesaj bireso netîceyêkê ke menfeatê her kesî tede estbo.”
Qubat Talabanî: Birêz Ocalan reyna berê çareserî akerd
Cagirê Serekê Hukmatê Dem Vîyarte yê Herêma Kurdîstanî Qubat Talabanî dîyar kerd ke Rayberê PKK’yî Abdullah Ocalanî reyna berê çareserîya aştîyane û demokratîk akerd û waşt ke her kes seba caardişê prosesî berpirsîyarîyanê xo bîyaro ca. Qubat Talabanî derheqê vengdayîşê Rayberê PKK’yî Abdullah Ocalanî de wina vat: “Şarê Kurd tim aştîwaz bîyo û sey rayîro tewr peyên seba pawitişê heqê xo û estbîyayîşê xo çek girewto xo dest. Birêz Ocalan reyna berê aştî û çareserîyêka aştîyane û demokratîk ya meseleyê kurdî Tirkîya de akerd. Tirkîya dest bi astêka newe ya xoverdayîşê sîyasî yê Kurdan kerd. Ma hêvîdar ê û ma wazenê ke na rey no proses seba şarê Kurd û Tirkîya bi netîceyêka bi zerrî biqedîyo. Wezîfeyê her kesî yo ke mesajê Birêz Ocalanî pêşwazî bikero û seba ke proses serkewte bibo hemkar bibê.”
