Hemserekê Pêroyî yê DBP’yî Keskîn Bayindirî vat ke peymana 29ê çeleyî seba şarê kurdan peymanêka tarîxî ya û pê na peymane kurdî reya verêne hetê sîyasîye ra ameyî qebulkerdene.
Bayindirî vat ke çiqas ke peymana 30ê çeleyî ameya îmzakerdene zî ablûkaya Kobanê dewam kena û 600 hezar merdimî şertanê giranan ê zimistanî de ciwîyenê. Bayindirî vat ke dewleta tirke bi hewayêko heyfgirewtişî nêzdîyê Kobanê bena û wazena bi astengîye aramîya kurdan hertim talûke de verdo û şarê kurdan mûhtacê xo bikero. Bayindirî vat: “Wazenê heyfê birîna 10 serran ra ver ke zerrîya serdestan de menda, bigîrê. La şarê kurdî êdî ney qebul nêkeno.”
Peymana 29ê çeleyî: Qebulkerdişêko tarîxî yo
Bayindirî vat ke heta nika hêzê herêmî û mîyanneteweyî QSD’yî tena sey hêzê leşkerîye ya hemverê DAÎŞî de nas kerdêne. Modelê Îdareyê Xoserî, statûyo sîyasî, komelkî û ekonomîk ê kurdan nêdîyêne. La bi peymana 29ê çeleyî reya verêne Tirkîye zî tede kurdî hetê ekonomî, sîyasî, komelkî û cografya ra ameyî qebulkerdene. Bayindirî vat: “Na peymane vernîya şerêko tarîxî girewte. 60 mîlyon kurdî heme dinya de bi yew nefesî, yew amancî û yew hîsî wirzîyayî lingan ser.”
Komployo 2. vera paradîgmaya Ocalanî yo
Bayindirî vat ke hêrişê ke vera kurdan ameyî kerdene komplo yê ke hetê ci yê herêmî û mîyanneteweyî est ê. Hêzê Brîtanya bi Doktrîna Şokî waştbî ke modelê Rojawanî çend rojan de bin bifînê. Rayberê şarê kurdî Ocalanî zî vatbî ke no komployo 2. o. komployo verên 1999î de hemverê estbîyayîşê Ocalanî de bî, yo newe hemverê fikr û felsefeyê Ocalanî de yo. La serkêşîya Ocalanî ya bêmabêne û xoverdayîşê şarê kurdî no komplo pûç kerd û ê mecbûr mendî ke peymana 30ê çeleyî bêro îmza bikerê. Bayindirî vat: “Rayberê şarê kurdî Ocalanî vatêne ‘Ma do meseleya kurdan dare ser ra bîyarê masa ser.’ Rasta zî no vatişê ci peymana 30ê çeleyî de ame caardene.”
Ruhê yewîye ganî serd nêbo
Bayindirî vat ke ruhê yewîya şarê kurdan ke çar parçeyan de vejîyaye, ganî tena bi hîsîyatî nêbo, bingeyê ci rêxistinbîyayîş, fikrê azadîye û têkoşînê 52 serranê Rayberê Şarê Kurdî Ocalanî û têgêrayîşê azadî yo. Bayindirî vat ke seke Ocalanî vat, ganî Kongreya Neteweyî ya Kurdîstanî heme parçeyan binê yew banî de bîyaro pêser. Bayindirî vat ke ganî: yewîya alfabe bêro awankerdene, stratejîyêka yewpare ya pawitişî bêro viraştene, dîplomasîyêka hempare bêro awankerdene û herkes binê sîwana kongreya neteweyî de xo û nirxanê xo bipawo.
Ocalan hema binê tecrîdî de yo
Bayindirî vat ke 15ê sibate ser ra 27 serrî vîyartî la Ocalan hema şertê tecrîdê giranî de ciwîyeno. Heta nika zaf komployî ameyî plankerdene la yew bi yew pûç vejîyayî. Bayindirî îfade kerd: “Wazenê ma kurdan bêsîstem û bê dost verdê. La ma bawer kenê ke bi rêxistinbîyayîş û yewbîyayîşê xo no komplo do bin bikewo. Waştişê şarê kurdî azadîya Rayberê xo Abdullah Ocalanî ya.”
