Zîyaretê seba tezîyeya hunermend Nîhal Ay roja dîyine de dewam kenê. Hemserekê Pêroyî yê DBP’yî Keskîn Bayindir û heyeto ke ey reyde bi tezîye zîyaret kerd.
Koordînasyonê Hîlala Zêrîn 24ê kanûne de eşkerayî dabî û dîyar kerdbi ke hunermend Nîhal Ay (Sîdar Andok) Rojavayê Kurdîstanî de cuya xo vîndî kerda. Seba Nîhal Ay Keyeyê Tezîye yê Çêrmûgijan a qezaya Peyasî de vizêr tezîye ameybî ronayene û zîyaretê tezîye yenê kerdene. Zîyaretî roja dîyine de dewam kenê.
Hemserekê Pêroyî yê Partîya Herêman a Demokratîke (DBP) Keskîn Bayindir, Hemşaredarê Amedî yê Şaristanê Girdî Serra Bucak û Dogan Hatun, endam û rayberê MEBYA-DER, DEM Partî, DBP, aktîvîstê TJA’yî, Dayîkê Aştî û xeylê kesî beşdarê tezîyeya Nîhal Ay bîyê û keyeyê Nîhal Ay rê serweşîye waşte. Zîyaretî de fatîha û duayî ameyê wendene.
Zîyaretê welatijan seba tezîye dewam kenê.
