Hemsereka Pêroyî ya DEM Partî Tulay Hatîmogullari kombîyayîşê grûbe ra pey cewab da persanê rojnamegeran û dîyar kerd ke agahî înan rê ameya ke roşanî ra pey beno ke Serekkomar Erdogan reyde pêvînayîş bikerê
Hemsereka Pêroyî ya Partîya Têduştî û Demokrasîyî ya Şaran (DEM Partî) Tulay Hatîmogullari kombîyayîşê Grûba Meclîsî ya partîya xo de derheqê rojeve de erjnayîşî kerdê û wexto ke kombîyayîş qedîya, teberî ra cewab da persanê rojnamegeran.
Tulay Hatîmogullari vat, “Seba pêvînayîşê ma yo bi birêz Erdogan beno ke roşanî ra pey pêvînayîşêk bêro kerdene. Tarix dîyar nîyo. Ma waştişê şîyayîşê Girawe kerdo, la heta nika ma cewab nêgirewto. Ma pawitêne ke verê Newroze şêrê la nêbî. Ma nê waştişî reyna kenê. Heyetê ma seba ney wazeno reyna şêro Girawe.”
