19ê adare de Şaredarê Stenbolî yê Şaristanê Girdî Ekrem Îmamoglu ame destbendkerdene û çar rojan ra pey ame tepiştene. Rasta zî na rewşe newa nîya. Coka heta nika vera hemşaredar û şaredaranê kurdan û reyna vera partî, sazî û dezgeyanê kurdan des serrî yo nê polîtîkayî dewam kenê.
Mîyanê des serran de her ke şarê kurd şaredarîyanê xo gênê qeyûmê îşxalkerî tayînê îradeyê şarî kerdêne. Na polîtîkaya ddewleta tirke hema zî dewam kena. Tewr peyên 15ê sibate de qeyûmê îşxalkerî tayînê Şaredarîya Wanî ya Şaristanê Girdî û îradeyê şarî kerd.
Helbet nê polîtîkayê binvistiş, îşxalkerdiş û tasfîyekerdişî yê vera şarê kurd bi destê CHP’yî ameybê qebulkerdene. Bi desan hemşaredar, parlamenter, endam û rayberê kurdan ameyê girewtene la CHP bêveng, ker û kor bî. A CHP ya ke heta ewro hende îşxalkerdişî temaşe kerdê, ewro eyn çî a bi xo ciwîyena. Heta ewro şarê dkurd bi hêriş û zilmê dewlete reyde rî bi rî mend û CHP reyna bêveng mende. Ewro eyn çîyî a bi xo ciwîyena. Xora demê xo de zî amebî vatene: Ti bêveng vinderê do dore bêra to zî!
Tirkîya de ne exlaq ne zî hiqûq mendo. Heta ewro seba ke heme polîtîkayanê xo yê îşxalkerî û tasfîyekerdişî meşrû bikerê, hiqûqê bi kar anê. Serra 1923î ra nat polîtîkayê binvistişî yê vera kurdan bi hiqûqê dewlete meşrû kerdê. Kurd û xoverdayoxê kurdî sey şakî, eşkiya û terorîst ameyêne namekerdene. Serra 1926î de seba ke têkoşînê kurdan binfînê, mehkemayê Îstîklalî awan kerdê û bi seyan kurdî uca de ameyê muhakemekerdene û dardekerdene. Vera nê polîtîkayanê tasfîyekerdişî şarê kurd se serrî yo bi taybetî şexsê PKK’yî de xover dano.
Heme polîtîkayê tasfîyekerdişî yê vera şarê kurdî CHP’yî awan kerdê. Bi polîtîkayanê faşîzmo sipî CHP heta serra 1961î şarê kurdî qirkerdişê kulturî ra vîyarnabî. Serra 1961î ra heta serra 1982î bi destê MHP’yî faşîzo sîya amebî awankerdene û zilmo vera kurdan hîna giran bîbî. Serra 1982î ra heta ewro zî bi polîtîkayanê îslamo sîyasî yanî faşîzmo kesk heme hewa û bi heme îmkananê xo polîtîkayê tasfîyekerdişî kurdan 45 serrî yo hîna çetin dewam kenê.
Se serra de ke vîyarte şarê ermenî, rûm û suryanî riyê polîtîkayanê qirkerdişê komelî û kulturî ra qedîyayîşî reyde rî bi rî mendê. Vera nê polîtîkayanê qirkerdişî şarê kurdî û Tevgerê Azadîya Kurdî heta roja ma ya ewroyîne bi qerardarîyêka pîle têkoşîn dano. Şarê kurdî heme zilm û hêrişan reyde rî bi rî mendê. Se serrî ra ver CHP ya ke nê polîtîkayî dabî destpêkerdene, ewro eke zûrî nêba ê bi xo nê polîtîkayan reyde rî bi rî manenê.
Girewtişê Îmamoglu reyde atmosfero sîyasî yê Tirkîya resa. Qonaxêka bîne. Vernîya CHP’yî de tena di rayîrî est ê. Yan têkoşîn yan zî teslîmbîyayîş. Lazim o CHP demo vîyarteyê xo ra ders veja. Eke CHP bi dewlete û partîyanê bînan ê faşîstan vera kurdan tu pêameyîşanê lêmînan nêkra do şarê kurdî piştî bido înan. La eke bi zîhnîyetê kesê sey Mansûr Yavaş ê faşîst û partîyê bînî yê faşîstan reyde hereket bikera do peynîya xo bîyara.
Şarê kurdî û DEM Partî heme wextî ra hîna xurt a. Şarê kurdî heme wextî ra hîna zaf wayîrê alternatîfan a. Tena seba Tirkîya nê seba heme cayê dinya şarê kurdî wayîrê perspektîf û projeyan o. Seba ney zî Rayber Ocalan vatbi “Ya çareserîya mi yan zî ya DYA’yî.” Eke CHP dirust û rast tebigêyra do tewrê vengdayîşê Rayber Ocalanî biba û do Komara Demokratîke ra berî bêrê akerdene.
