Dewa Kaçanî de seba endama YJA-Starî Zeyna Kaya tezîye ameye ronayene. Bi girseyî tezîye ameye zîyaretkerdene. Maya aye Vahîde Kaya tezîye de vat ke kênaya aye şehîda Kurdîstanî ya û Abdullah Ocalanî rê serrweşîye waşte.
Amebi eşkerakerdene ke endama YJA-Starî Zeyna Kaya (Rojîn Rojhat) 10ê nîsana 2018î de herêma Xakûrkê ya Başûrê Kurdîstanî de şer de cuya xo vîndî kerda. Keyeyê aye dimayê eşkerakerdişê nasnameyê kênaya xo dewe de tezîye akerde. Parlamenterê DEM Partî Mehmet Zekî Îrmez, endam û rayberê DEM Partî û DBP’yî yê Şirnexî, rayberê MEBYA-DER’î yê Şirnexî, endam û rayberê sazgehanê komelkî û xeylê welatijî şîyê zîyaretê tezîyeya Zeyna Kaya.
Demo ke girse resa dekewtişê dewa Karçanî ya girêdayeyê qezaya Elkê ya Şirnexî, rayra şi û rayîrşîyayîşî de sloganê, ‘Şehîd Namirin’ vat. Dima girse resa vernîya berê tezîya û seba şehîdan rêze ameye girewtene.
Hemsereka MEBYA-DER’î ya Şirnexî Emîne Erkuş keyeyî rê serweşîye waşt û dîyar kerd ke Elkê xeylê bedêlî dayê û îfade kerd ke do wayîrê ê bedêlan vejîyê. Emîne Akkuş dîyar kerd ke heta çilka gonî canê înan de est ba do peyê dewaya şehîdanê xo bibê.
Hemsereka DEM Partî ya Şirnexî Taybet Bîlgî zî îfade kerd ke ê reyna heme şehîdanê Kurdîstanî anê xo vîr û wina vat: “Koyê Elkê bi têkoşîn û şehîdanê Kurdîstanî yenê naskerdene. Ma bi înan sereberz ê û ma deydarê înan ê. Ganî ma wayîrê şehîdanê xo vejîyê. Înan seba ma têkoşîn kerd. Rayîrê înan roşnîya Kurdîstanî yo.”
Ocalanî rê serweşîye waşte
Maya Kaya, Vahîde Kaya zî wina vat: “Kênaya mi şehîda Kurdîstanî ya, ez pê aye sereberz a. Wa sereyê Ocalanî weş bo, Bijî Serok Apo.”
Qiseykerdişan ra pey tezîye bi wendişê duayan qedîyaye.
