Bi hezaran Kurdîstanijan cenazaya Endamê Komîteya Hemserekîye ya PYD’yî Salih Muslimî ver bi Kobanî oxir kerd.
Rojava de bi hezaran kesan, kurd, ereb, suryanî û beşê bîn ê şaran pîya cenazaya Endamê Komîteya Hemserekîye ya PYD’yî şehîd Salih Muslimî ver bi Kobanî oxir kerd. Merasîmê oxirkerdişî hetê Meclîsê Keyeyê Şehîdan ê Qamişlo ra Stadyûma 12ê Adare de ame kerdene.
Merasîm de temsîlkarê eşîranê kurd û ereb, sîyasetmedarî û sewbîna temsîlkarê partî û têgêrayîşê sîyasî yê Vakur û Başûrê Kurdîstanî ra heyetêk zî beşdar bi.
Merasîm rêzgirewtişî reyde dest pêkerd. Dima mesajo ke Rayberê Şarê Kurdî Abdullah Ocalanî ame wendene ke seba Salih Muslimî erşawitbi.
Nameyê Meclîsê Keyeyê Şehîdan ê Qamişlo ser o hemserekê meclîsî Ubeyd Etê qisey kerd. Ubeyd Etê vat ke Salih Muslimî dewaya kurdan girewtibî xo dest û 50 serrî ra vêşêr bêteredut û bêpawitiş têkoşî kerdê û şertanê tewr zehmet de xizmetê şarê xo kerd. Ubeyd Etê vat ke tena şarê Rojava nê heme parçeyê Kurdîstanî seba şehadetê Salih Muslimî dejêko gird anceno. Peynî de vat ke do taqîbkerdoxê xeta şehîdan bibê û xeyalê înan bîyarê ca.
Endameya Konseya Hemserekîye ya PYD’yî Foza Yûsif zî qisey kerd û şarê kurdî rê serweşîye waşt. Foza Yûsif vat ke têkoşînê azadîye de vîyarteyêko derg ê Salih Muslimî est bi, 1980î ra bêvindertiş xebitîyayo, fîkrê Rayberê Şarê Kurdî Abdullah Ocalanî vila kerdê û heqê şarê kurdî pawit. Foza Yûsif wina vat: “Hetê rejîmî ra ame destbendkerdene û îşkence di. Pê naye zî yew roje zî pawitişê dewaya şarê xo de teredut nêkerd. Xoverdayoxêk bi ke raştîye vatêne. Keyeyêko welatperwer ra bi cepheyê şorişî de kede daya.”
Foza Yûsif qiseykerdişê xo wina domna: “Salih Muslim tena sîyasetmedarêk nêbi, eynê wextî de nuştox û edebîyatkarêkê Şorişê Rojava bi û seba geşkerdişê zîhnîyetê Kurdîstanî kîtabê Rayber Apoyî açarnaybî. Seba ronayîşê yewbîyayîşê neteweyî yê kurdan demêko derg têkoşîn kerd. Keyeyêko welatperwer, demokrat û xoverdayox pîl kerd. Lajêkê ey Rojava de şerê vera DAÎŞ’î de şehîd kewtbi. Eynê wextî de piştgirîya dewaya cinîyan kerd û seba azadîya cinîyan û beşdarbîyayîşê cuya komelkî xebitîya.”
Merasîm de heyetê Yewîya Niştîmanî ya Kurdîstan (YNK) gorê şehîdan ser o çelenk ronaye û nameyê serekê YNK’yî Bafîl Talebanî ser o Luqman Werdî qisey kerd. Nameyê sîyasetmedaranê Başûr û Rojhelatê Kurdîstanî ser o sîyasetmedar Serdar Abdullahî qisey kerd.
Keyna şehîd Salih Muslimî Perwîn Muslim zî qisey kerd, sipasîya sazgehanê Başûrê Kurdîstanî kerd û soz da ke aye rayîrê pîyê xo de şêra.
Peynîya merasîmî de embaz û merdimanê Salih Muslimî cenaza ver bi Kobanî oxir kerd. Cenaza do Kobanî de bi merasîmêk bêra definkerdene.
