Polîsan Licê de bi manaya ke qewexane de kanalê Medya Haber TV akerdo qasê aşmêk qewexane mor kerd.
Wêxtêko winasîn de ke munaqaşeyê çareserîya meseleyê kurdî benê şaristananê vakurê Kurdîstanî de şarê ser o zilm û qedexeyî her ke şono hîna zaf benê. Nimûneyekê na nakokî qezaya Licê ya Amedî de yeno vînayene. Polîsê ke Lîcê de qewexanayêkê bi manaya ke kanalê Medya Haber TV’yî akerdo, qewexane mor kerd.
Polîsê ke şîyê qewexaneya Erhan Akkan ewil televîzyona padaya akerd û dima ra zî kanalan ra gêrayê û kanalê Medya Haber TV akerd. Polîsanê ke kanalî de paweyê xeberan ke derheqê Rayberê PKK’yî Abdullah Ocalanî de yê vindertê, dima ke fotografê Abdullah Ocalanî ameyê weşanayene, fotograf ant û bi îdiaya “propagandaya rêxistine” qasê 30 rojan qewexane mor kerd.
Paweyê weşanayîşê fotografê Abdullah Ocalan vindertê
Wayîrê qewexaneyî Erhan Akkan verba morkerdişê cayê karê xo reaksîyon nîşan da û vat: “4ê sibate de polîs ameyê qewexaneya mi û telezvîzyona min a girewta akerd. Ewil kanalan ra gêrayê û dima kanalê Medya Haber ser o vindertê. Qasê 5 deqîqeyan vindertê. Wexto ke fotografê Abdullah Ocalanî vejîyayê fotografê televîzyone antê.
Qerarê morkerdişî
Belgeyanê polîsan de zî ame îdiakerdene ke qewexaneyî de “propagandaya rêxistine” ameya kerdene. Akkan vat ke no qerarêko bêhiqûqî yo û do hemverê nê qerarî şêro Mehkemeya Cezayê Sulhî ya Licê gere bikero. Ame zanayene ke qeza de zilm yeno kerdene ke Medya Haber TV temaşe nêkerê.
