Sazgehanê sîvîlî çarçewaya Hewteyê Heqanê Merdiman de rayîrşîyayîş organîze kerd. Raybera ÎHD’yî Emîne Ozer Arslan bale ant Prosesê Aştî û Komelê Demokratîkî ser o û vat: “Aştî bêra ca do seba Rojhelatê Mîyanênî biba nîmûne. Amanc û waştişê ma caameyîşê aştî yo.”
Bi pêşengîya Baroyê Amedî, Komela Huqûqnasanê Seba Azadîye (OHD), Odaya Doktoran a Amedî, Komela Heqanê Merdiman (ÎHD), Komela Jinan ya Rosayî, Weqfa Heqanê Merdiman a Tirkîya ya Şubeyê Amedî (TÎHV) Qada Şêx Seîdî ra heta Berê Sarayî rayra şîyê. Temsîlkarê sazgehanê sîvîl, partîyê sîyasî, Dayîkê Aştî û xeylê kesî beşdarê rayîrşîyayîşî bîyê. Pankartê “Aştî bi Heqanê Merdiman Mumkin a” ame girewtene. Rayîrşîyayîşî de girseyî sloganê “Jin jîyan azadî”, “Ma şer nêwazenê, ma aştî wazenê” ameyê vatene. Rayîrşîyayîşî ra pey Berê Sarayî de eşkerayî ameye dayene. Eşkerayîya çapemenî hetê Hemserekê Şubeyê ÎHD’yî bi tirkî wend. Verê ke rayîrşîyayîş dest pêbikero, ma mîkrofonê xo endama Rayberîya Komela Heqanê Merdiman a Şubeyê Amedî Emîne Ozer Arslanî rê derg kerd.
‘Aştî biba do seba Rojhelatê Mîyanênî biab nimûne’
Raybera Komela Heqanê Merdiman a Şûbeyê Amedî Emîne Ozer Arslan derheqê rayîrşîyayîşî de nê çîyî vatê: “Seke şima zanê 10ê kanûne ra heta 17ê aşme hewteyê Heqanê Merdiman o. Nê hewteyî de xeylê çalakîyê ma do bibê. Ewro zî ma rayîrşîyayîş kenê. Şima zî zanê ke prosesê Aştî û Komelê Demokratîkî de dewlete gaman nêerzena, rayîrşîyayîşê ma seba ney yeno kerdene. Sewbîna zî bi hezaran girewteyê ma hepisxane de yê. PKK’yî gamê xeylê girdî eştê seba prosesî. Şekî veşnayê, hêzê xo Tirkîya ra apey antê, dewlete rixmê nê gaman, vatişan ra nêvîyarta. Tirkîya de sebebê krîzê aborî no şer o. Ganî şarê kurdî xo bi ziwanê zo îfade bikero. Aştî bêra do seba Rojhelatê Mîyanênî biba nimûne.”
‘Seba prosesî destê ma ra çi bêro ma do bikerê’
Hemserekê Şubeyê ÎHD’yî dîyar kerd ke o nameyê 63 sazgehan ser o qisey keno. Ercan Yilmazî îfade kerd ke mîyanê aştî û aramî de ciwîyayîş, heqê merdiman o. Seba ke heqê merdiman bêrê ca ganî aştî biba. Aştî biheqanê merdiman mumkin a û Ercan Yilmaz wina û Ercan Yilmazî wina dewam kerd: “Tewr peyên teşrîna verêne serra 2024î de prosesêk ameyo destpêkerdene. Çareserîya na mesela mîyanê şarî de bîya sebebê keyfweşî û kelecanî. Ma zî seba ney keyfweş ê, ma tîya de vanê ke seba prosesî destê ma ra çi bêro ma do bikerê, ma do piştgirîye bidê prosesî.”
