Cagirê Hemserekê Pêroyî yê DBP’yî Huseyîn Bîrlîkî derheqê komployo ke 27 serrî ra ver hemverê Rayberê Şarê Kurdî Abdullah Ocalanî amebi kerdene vat ke hêzê hegemonî bi girewtişê Ocalanî waştbi ke têkilîya şarî û rayberê ci bibirnê û vat: “Bi nê komployî waştbi ke ameyoxê şaran tarî bikerê. La Birêz Ocalanî tecrîdêko zaf giran de xoverdayîşêko bêemsal mojna û bi vengdayîşêko xurt şarê kurd û heme şaranê dinya rê mijdanî daye.”
Hêzê hegemonî seba ke astengîyê ke vernîya înan de yê hewanê, hemverê Ocalan de komplo plan kerd. 9ê Teşrîna Verêne ya 1998î de Ocalan bi komployêko mîyanneteweyî Sûrîye ra ame vetene û verê ci da Ewropa. 130 rojan ra dima, 15ê sibata 1999î de Kenya de bi destê hêzanê mîyanneteweyîyan ame girewtene û Tirkîya rê ame teslîmkerdene. Girewtişê Ocalanî seba şarê kurdî sey “Roja Tarî” yena pênasekerdene. A roje ra heta nika hêrs û nerazîbîyayîşê kurdan dewam keno.
Ocalan 27 serrî yo Hepisxaneyê Îmralîyî de mîyanê tecrîd û îzolasyonêko giran de yo la bi xoverdayîş û têkoşînê xo yê seba aştî, azadîye û demokrasî komployê hemverê xo de puç kerd. Serrêk o ke prosesê Aştî û Komelê Demokratîkî dayo destpêkerdene.
‘Hêzanê hegemon bi Sykes-Picotî Kurdîstan kerd çar parçe’
Bîrlîkî vat ke hêzanê mîyanneteweyî bi Sykes-Picotî Kurdîstan kerd çar parçe û waştbi ke şarê kurdî Rojhelatê Mîyanênî de bikerê bingeyê kaosan û îna çin bikerê. Bi destê dewletan Rojhelatê Mîyanênî de zî meseleyê kurdan waştbî ke bigîrê binê kontrolê xo û sîyasetê xo yê hegemonîk rayra berê.
‘Hêzanê mîyanneteweyî nêwaşt ke mesele bêro çareserkerdene’
Bîrlîkî vat ke Rayberê Şarê Kurdî wexto ke tegêrayîşî awan kerdbi, şertanê ê wextî de hîra fikîrîyabi la hêzanê hegemon nêwaştbi ke no mesele bêro çareserkerdene.
‘Waştbi ke bi komployî şar û rayberê ci cîya bikerê’
Bîrlîkî vat ke amancê komployê 15ê sibate o bi ke mabênê Rayberê Şarê Kurdî û şarê kurdî bêro birnayene la vendgayîşê 27ê sibatê seba şaran bi hêvîyêka xurte. Bîrlîkî wina vat: “O ke eşkeno na mesele çareser bikero Birêz Ocalan o. Coka şert û mercê azadkerdişê ey lazim ê ke bêrê caardene. Şarê kurdî her tim bi her hewayî meydanan de, mîtîngan de bi yew vatişî vano ke cuya bê Birêz Ocalanî qebul nêbena.”
‘Ma bi yewîya xo eşkenê komployî hewanê’
Bîrlîkî tewr peynî bale ante paradîgmaya Ocalanî ke hesabê hêzanê hegemonî puç kerdê ser o û vat: “Puçkerdişê komployê 15ê sibate bi wayîrvejîyayîşê vengdayîşê 27ê sibate beno. Eke ma bieşkê nê vengdayîşî mîyanê cuye de awan bikerê, no komplo do binkewo. Ganî ma hem dîplomasî de hem zî sîyaset de nê komployî reyêk de hewanê. Ma heme şarî hêzê xo bikerê yew û na roja ke waştbî ameyoxê şarê kurdî tarî bikerê, ma roşnî bikerê.”
