Platformê Dezgehanê Demokratîkan ê Amedî qezaya Bismilî de kombîyayîşê Aştî û Komelê Demokratîkî viraşt. Beşdaranê kombîyayîşî waşt ke heqê hêvîye yê Rayberê Şarê Kurdî Abdullah Ocalan bêro pawitene.
Platformê Dezgehanê Demokratîkan ê Amedî, salona dawete ya Firatî ya ke taxa senayî ya Bismilê Amedî de ya, kombîyayîşê Aştî û Komelê Demokratîkî viraşt. Têhetamayîşê şarî de temsîlkarê DEM Partî, Aktîvîstê TJA’yî, temsîlkar û îdarekarê DBP’î, endamê Komeleya 78’an, Komeleya Dayîkanê Aştîye, MEBYA-DER, TUAY-DER, TMMOB, MED-DER, tewrê temsîlkaranê rêxistinanê sîyasî û sivîlan ê qeza û xeylê kesî tewrê kombîyayîşê şarî bîyî.
Kombîyayîş de sloganê “Bijî Serok Apo” û “Şehîd Namirin” ameyî berzkerdene. Bername de semedê kesanê ke têkoşînê azadîye de canê xo dayo rêzgirewtiş ame kerdene. Çetîn Arkaşo ke 33 serrî hepisxane de mendo, sîyasetmedare Ayla Akat Ata û Avûkate Buroya Huqûqî ya Asrinî Suzan Akîpa tewrê bernameyî bîyî.
Avûkate Buroya Huqûqî ya Asrinî Suzan Akîpa daye zanayene ke nêzdîyê ser û nîm o Rayberê Şarê Kurdî Abdullah Ocalan proseyê aştîye dayo destpêkerdene û va: “Mîyanê na serre de xeylê cayê Kurdîstanî de xeylê kombîyayîşê winayinî ameyî viraştene. Yew serre de di rey pêvînayîşê avûkatan Rayberê Şarê Kurdî Rayber Abdullah Ocalan reyde ameyî kerdene. Prose de pêvînayîşê Rayber Abdullah Ocalanî û dewlete virazîyenê. Xeylê ray Rayber Abdullah Ocalan, pêvînayîşanê keye û avûkatan de vano, prensîbê demokratîkî hema zî şert û mercanê guncavan de nîyê. Ganî her tim azadîya fîzîkî ya Serek Apoyî rojeve de ba. Wa tewrê prose bibê, na yewe reyde zî meseleya entegrasyonê demokratîkî zî bêro ziwan. Entegrasyono demokratîk semedê asîmîlasyonî nîyo, kerdişê azadîye û aştîye yo. Entegrasyono demokratîk bingeyê way û birayîya şarê kurd û tirkî yo. Na yewe reyde ganî entegrasyono demokratîk de estbîyayîşê kurdan her ca de, heqê kurdan bêro şinasnayene. Birêz Ocalan heqê kurdan û neteweya înan pîya erjneno. Êdî wextê azadîya fîzîkî ya Serek Apoyî ameyo. Ê her tim mîyanê têgêrayîş û hereketan de yê, semedê ke şarê mkurdî bireso heqê xo yê bingeyinî. Ganî her kes çiyo ke keweno milê înan bikero.”
‘Ma do xo rêxistin bikerê’
Sîyasetmedara kurde Ayla Akat Ata zî verî ard ziwan ke her gama ke înan eşta, semedê prosesî muxatabêk çin bîyo û vat: “Serrê 2013 û 1993î verê çiman de yê. Birêz Ocalan o wext zî vatêne ez gêrena muxatabî. Îradeyê Serekî hema zî eynî yo û nêbedilyayo. Ma weçînayîşê 2015î de dî ke senî ame viraştene, dima zî dest bi xirabkerdişê prosesî ame kerdene. Êdî tewr peynî Dewlet Bahçelî par Meclîs de destê parlementeranê ma girewt. Dima Serekî va, ez wayîrê a qudretî ya ke aştîye bîyara ca. Şikir ma wayîrê Serekêkê winayinî yê. Na herre ser o reyna heme şarî ciwîyenê û no welatê ma yo. Ma her dewr her çî înan reyde bare kerdo. Ma do semedê heme şaranê bindestan xo rêxistin bikerê. Sey ke ma dî, di hewteyî verî Stenbol de konferans ame viraştene. Uca de zî xeylê kesan va ê ameyê ver bi roşnîye. Hepisxaneyan de bi hezaran embazê ma yê ke aştîye wazenê esîr yenê girewtene. Eke proses nêro ca, aştîye zî nêna ca.”
‘Cinîyan serranê 90î ra heta ewro pêşengîya nê komelî kerda’
Dewam de Ayla Akat Ata bale ante kar û xebatanê xo yê ke serranê 90î de rayra berdê ser û va ke înan zî sey pawitoxanê heqanê merdiman semedê aştîyêka domdare xebetîyayê û wina qedîna: “Ma wazenê sey şarê kurdî mîyanê nê komelî de bi hawayêko azadî biciwîyê. Xeylê dayîkanê ma tirkî nêzanê. Nika ke înan ra bêro persayene do vajê, ez kurd a, ez nêşena tirkî qisey bikera. Êdî raştîya Rojhelatê Mîyanênî û raştîya komelî sey 15 serranê verî nîya, êdî xeylê çîyî bedilyayê. Ma 2025 de ciwîyenê. Êdî şarê ma hişyar o, êdî qise qisa ma ya. Ma şenê 4ê aşme de bi kar û xebatanê xo, xo biresnê mîtîngî û ma bi tewrbîyayîşê xo, xo bimojnê. Eke şar xo nêmojno, proses zî nêdêna rayra. Reyna ma do pey de gaman nêerzê. Ma do têkoşînê xo yê azadîye bidomnê. Cinîyan serranê 90î ra heta ewro xo mojnayo û pêşengîya nê komelî kerda. Hereketê Cinîyanê Azadan, her tim bi xebatanê xo vejîyayo vernî. Xelesîyayîşê şaranê bindestan bi paradîgmaya Xoserîya Demokratîke awan beno. Ganî ma qad bi qad û taxe bi taxe rêxistina xo newe ra awan bikerê. Dewlete serra 2009î de dî ke ma bi hêz ê û dest bi operasyonanê KCK’î kerd.”
‘Erjê kurdbîyayîşî her ca de vila bîyê’
Çetîn Arkaşo ke 33 serrî hepisxane de mendbi zî qisey kerd û va: “Semedo ke aştîyêka domdare bibo ganî ma heme hereket û partîyan reyde pêvînayîşan bikerê. Eke na prosesê aştîye bêro rayraberdene, ganî heme salonan de posterê Serek Apoyî nê, ganî êdî o bi xo uca de bo. Semedê weçînayîşê 7ê Hezîrane ra proses ameye xirabkerdene. Xora verê cuye zî proses amebî xirabkerdene. Badê ke proses ameye xirabkerdene Hepisxaneyê Îmraliyî de şîdetî zêde bî. Wexto ke Tahîr Elçî ame qetilkerdene Serek Apoyî wina vatbi, mergê Vedat Aydinî çi bo yê Tahîr Elçî zî o yo. Nika prosesêko newîye ameye destpêkerdene, Dewletê Mîyanneteweyî heyranê çimanê sîyayan ê kurdan nîyê. Serek Apo nê rolê hêzanê Mîyanneteweyî baş waneno û vîneno. Ê çi bikerê zî do peynîya înan bêro nê têkoşînî ver de vinderê. Erjê kurdbîyayîşî her ca de vila bîyê.”
Bername bi pers û cewaban qedîya û dima do bername qezaya Farqînî de dewam bikero.
