Çapemenîya dinya de peymana mabênê HSD û Hukmatê demkî yê Sûrîye sey vurîyayîşêko stratejîk ameye erjnayene û tesîrê aye yê sîyasetê herêmkî ser o û têkilîya aye sîyasetê mîyanneteweyîye reyde ame dîyarkerdene.
Xeber û analîzan de ame resnayene ke şert û waştişê kurdan do ameyox de bi şeklêko muhîm bêrê munaqeşakerdene û tayê weşanan ney bi şîroveyê “Bê kurdan aramîya menda mumkun nîya” pênase kerd.
Ajansa Amerîka Associated Press (AP) prosesî game bi game cuya gamanê peymane sey netîceya şertê neweyî yê emnîyetî ke Sûrîye de aşkera bîyî nirxnaye. AP’yî xebera xo de bale ante rolê Dewletanê Yewbîyayê yê Amerîka ser û vat ke na peymane goreyê hêvîya ke DAÎŞ reyna nêagero û Sûrîye de tesîrdar nêbo, ameya viraştene.
‘Şam wazeno merkezîbîyayîşî xurt bikero’
Rojnameyê Amerîka The Washington Post zî peymane û prosesî çarçeweya vurîyayîşê hemsengîyanê neweyê herêmkîyan de nirxnaye. Rojnameyî nuşt ke Şam bi na game wazeno kontrolê merkezîye xurt bikero, la eynî wext de şerê vera DAÎŞî de şertê kurdan û rolê înan ê zî nêeşkeno peygoş bikero.
Rojnameyê The National a Yewîya Îmaretanê Ereban zî bale ante waştişê merkezîbîyayîşî yê Hukmatê Demkî yê Sûrîye ser. Rojnameyî nuşt ke Şam bi piştîdayîşê şert û mercanê mîyanneteweyîyan wazeno serdestîya xo ya heme erdanê Sûrîye ser reyna xurt bikero. Xebere de rewş û pozîsyonê kurdan sey astengo sereke yê vernîya stabîlbîyayîşê Rojawanî ame nîşandayene û ame eşkerakerdene ke kurdan reyde bê peyman û pêameyîş aramîya menda na herême de mumkun nîya.
Ajansa Îtalya Agenzia Nova kombîyayîş û eşkerayîyê ser cuya peymane sey beşêkê prosesê sîyasîye ya Sûrîye nirxna. Ajanse bale ante şertanê xoserîye ser û eşkera kerd ke beno ke peymane rayîr akero vernîya nirxnayîşanê neweyan ê statuyê kurdan.
‘Peymana Sûrîye û prosesê Tirkîya têkildar ê’
Rojnameyê Brîtanya The Independent Sûrîye de prosesî bi averşîyayîşanê Tirkîya reyde têkildar nirxnayî. Rojnameyî nuşt ke munaqeşayê problemê kurdî yê Tirkîya de û qiseykerdişê ser haştîye, prosesê Sûrîye reyde nêzdî ra têkildar ê. Rojnameyî dîyar kerd ke Sûrîye de averşîyayîşî, sîyasetê Enqere û proseso ke yeno rayberdene, ser o tesîr bikero.
