Tarixê têkoşînê azadîya Kurdîstanî de Licê cayêko zaf girîng û stratejîk gêna. Labelê, serranê peyênan de, xusûsen nê demê taybetî de, Licê û dormerayê ci de tayê polîtîkayê cîyayî û bixetereyî yenê rayîrberdene. Nê polîtîkayî, rasterast vera ciwanan û cinîyanê kurdan hedef gênê
Ewro Licê de, kuçe û kolanan de, heta mîyanê dibistanan de vilabîyayîşê maddeyanê hişberîyan tesaduf nîyo. Sîstemo hukimdar, cayê ke tede hîşê sîyasî û neteweyî xurt o, uca de wazeno ke ciwanan nê hîşî ra dûrî bifîno. Seba nê armancî zî, çeko tewr tesîrin maddeyê hişberî û fuhuş o. Bi nê her di silgiran, wazenê ke ciwanê kurdî nasname, kultur xo û doza xo ya azadîye ra dûr bifinê û bibê koleyê sîstemî.
Goreyê xebera Rojnameyê Xwebûnî rêxistinê komelê sîvîlî û partîyê sîyasîyî yê herême zaf reyî raporanê xo de dîyar kenê ke kesê ke nê jehrî (maddeyan) vila kenê, tewr zaf hetê hêzanê “emnîyetî” ra yenê pawitene ya zî çimê xo nê kesan ser o gênê.
No zî musneno ke no “bazirganîya” tenya karê çeteyan nîyo, parçeyêkê konseptê şerê taybetî yo. Armanc o yo ke Licê de ciwanê ke gerek pêşengîya komelî bikerê, nêverdanê ke xo bişinasnê; êyê ke ganî vera zilmî vejîyê, binê tesîrê maddeyan de bêrê bêhêzkerdene.
‘Modernîteya Kapîtalîste û qirkerdiş’
Rayberê Şarê Kurdî Abdullah Ocalan, nê polîtîkayan tenya sey “sucê edlî” nêvîneno. Ocalan nê wezîyetî sey “Qirkerdişê Kulturî” û hêrişê vera “Komelo Ehlaqî û Polîtîk” pênase keno. Goreyê Rayberê Şarê Kurdî Abdullah Ocalanî, modernîteya kapîtalîste seba ke hukmê xo dewam bikero, no ser zî komelî hûre bi hûre parçe keno. Rayberê Şarê Kurdî Abdullah Ocalan, kitabanê xo de wina vano: “Sîstemo kapîtalîst, seba ke kesayetê azadî çin bikero, her tewir metodan şuxilneno. Fuhuş û maddeyê hişberî, tenya meseleyê şexsî nîyê; nê sigirêko sistematik ê ke seba kolekerdişê ciwanan û cinîyan yenê xebitnayene.” Goreyê felsefeya Rayberê Şarê Kurdî Abdullah Ocalanî, têkoşînê vera nê xirabîyan, eynî wext de têkoşînê vera sîstemê desthilatdarî yo.
Ocalan bala anceno ser ke kapîtalîzm beden û ruhê merdiman keno meta (mal) û roşeno. Fuhuş, nê “bazarîkerdişê bedenî” ra yew o. Labelê Ocalan vano ke fuhuş tenya rotişê bedenî nîyo; “Fuhuşo tewr gird, o yo ke merdim fikrê xo, rûmetê xo û welatşinasîya xo biroşo.”
Licê de cinî û ciwanî; Hedefê serekeyî Licê de polîtîkayê fuhuşî, xusûsen seba şikitişê îradeyê cinîya kurdî yeno rayirberdene. Cinîye, mîyanê kulturê kurdan de û têkoşînê azadîye de wayîrê cayêkê girdi ya. Eke cinîye bikewo, komel keweno.
Rayberê Şarê Kurdî Abdullah Ocalan, azadîya cinîye sey “Azadîya komelî” vîneno. Coka, sîstem zî seba ke komelî teslîm bigîro, verê cû cinîyan hedef gêno.
Wexto ke ma ewnîyenê Licê ra, ma vînenê ke tayê “karmend/memurî” yan zî kesê ke sîstemî ra girêdayeyî yê, bi nameyê “eşq” û “dostîye” nêzdîyê keynayê ciwanan bene û dima înan ancenê mîyanê batakxaneyê fuhuşî û ajanîye. Rayberê Şarê Kurdî Abdullah Ocalan vera nê kayan zaf hîşyar keno û vano: “Cinîya azade, cinîya ke xo, nasnameyê xo û zayendê xo şinasnena ya. Vera şerê fuhuş û kulturê tecawuzî, şerê rûmetî yo.”
Çareserî: Xopawitişê cewherî yo
Vera nê polîtîkayanê lêminan de çareserî çi ya? Rayberê Şarê Kurdî Abdullah Ocalan û têgirê ey, çareserîye “Komelo ehlaqî û polîtîk” de vînenê. Ciwanê Licê ganî nê kayanê lêminan bivînê.
Sîlaho tewr gird hîşmendî yo
Rayberê Şarê Kurdî Abdullah Ocalan vano ke “Sîlaho tewr gird zanayîş û hîşmendî yo.” Ganî keyeyî, şaredarîyî û dezgehê sîvîlî ciwanan perwerde bikerê û înan nê dameyan (tuzaxan) ra bipawê. Komel ganî vera maddeyanê hişberîyan û kesê ke fuhuşî teşwîq kenê, bertekê xo bimojno. No, parçeyêkê “Xopawitişê cewherî” yo. Xopawitiş tenya bi çek nêbeno; pawitişê kultur û ehlaqê xo zî xopawitiş o.
Vera ciwîyayîşê modernîteya kapîtalîste ke merdiman keno sey robotan û gêj keno, ganî alternatîfê “ciwîyayîşê azadî” bêro awan kerdene. Çîyê ke ewro Licê de qewimîyenê, cîya-cîya nîyê. Licê, seba ke merkeze xoverdayîşî yo, bi zanebiyayîş yeno hedef kerdene.
Polîtîkayê uyuşturucu û fuhuşî, parçeyê konseptê “çinkerdişî” yê. Rayberê Şarê Kurdî Abdullah Ocalan, nê wezîyetî sey nêweşîya komelî pênase keno û dermanê ci zî bi “Azadkerdişê hişî” û “Rêxistinkerdişê komelî” nîşan dano. Waştişê Rayberê Şarê Kurdî Abdullah Ocalanî ciwanan ra no yo: “Xo, bedenê xo, hîşê xo û welatê xo bipawê. Hêzê ke wazenê şima bêhiş bikerê, dişmenê tewr pîl ê merdimeyîye yê.” Coka, xoverdayîşê Licê, tenya vera tank û topan nîyo; ewro xoverdayîşê tewr girîng, xoverdayîşê vera lêminkerdişê ehlaq û wicdanî yo.
