Sema Yuce 21ê adare 1998î de bi vatişê “ez wazena mezgê xo, zerrîya xo, bedenê xo mîyanê 8ê adare û 21ê adare de bikera pird” bedenê xo da ver adirî û bîye sembolêkê çelenga Newroze. Rayberê Şarê Kurdan Abdullah Ocalanî zî seba Sema Yuce wina vano: “Her şer, bi taybetî zî seba vindertişê şerê qirkerdişî, kesayetêka sey Sema ya têkoşere hewce kena.”
Sema Yuce serra 1971î de dewa Qerqelîya Cêrêne ya girêdayeyê taxa Dutaxê ya Agirî de ameya dinya. Dibistane Qerqelîye de, mektebo mîyanên Dutaxe de û lîse zî Agirî de wend. Beşa Komelşinasî ya Unîversîteya Teknîkî ya Rojhelatê Mîyanênî (ODTÛ) de dest bi wendişî kerd û tîya de Têgêrayîşê Azadîye nas kerd. Mîyanê Têgêrayîşê Azadîye de bi nameyê kodî yê “Serhildane” û “Leyla” ameyêne naskerdene.
Serra 1991î de bajarê Mêrdînî ra bi komêka hevalanê xo reyde beşdarê PKKyî bîye. Dima şîye Dola Beqa û demêk Rayberê Şarê Kurdan Abdullah Ocalanî reyde mende. Badê perwerdeyêko kilm serra 1992î de bi komêka hevalanê xo reyde agêrîya warê Serhedî û dest bi xebatan kerd.
Hamnanê 1992î de merkezê Agirî de bi komêka hevalanê xo reyde encamê îstîxbaratêk de ameyê destbendkerdene. Dadgehe de pawitişê sîyasî kerd. Encamê muhakemeya formalîte de 22 serrî cezaya girane ameye birrnayene. Sere de sirgûnê Nevşehîrî dima sirgûnê hepisxaneyê Çanakkale ameye kerdene.
Şewa Newroza 21ê adare 1998î de hepisxane de çalakîya fedaîye awan kerd û bedenê xo da ver adirî. Sema Yuce ke bi giranî birîndar bîye, Nêweşxaneyê Fakulteya Tîbî yê Cerahpaşayî yê Îstanbulî de 30 rojan tedawî bîye û 17ê hezîrane de şehîd bîye.
Sema Yuce vernîya çalakîya xo bi mektûbêk xîtabê Rayberê Şarê Kurdan Abdullah Ocalanî, cinîyan ê kurdan û şaranê dinya kerd. Sema Yuce mektûbe de wina vat:
“Ez wazena mezgê xo, zerrîya xo, bedenê xo mîyanê 8ê adare û 21ê adare de bikera pird. Seba ke ez biba şagirdêka zîreke ya Kawayê Hemdemî Mezlum Doganî, ez wazena sey Zekîye biveşa, sey Rahşane biba Newroze. Ez wazena bawerîya xo ya ke cinî zî şêna bibo hemraye, bi çalakîyêka esîle tacîdar bikera.”
Rayber Apo seba Sema Yuce wina vano: “Her şer, bi taybetî zî seba vindertişê şerê qirkerdişê giranî yê şarê ma, kesayetêka sey Sema ya têkoşere hewce kena. Raştîya Sema, yena manaya heskerdiş, weşîye, wayîrîya nasnameyê biîdîa. Şervana girde ya azadîye, yena manaya cinîya ke teslîmê camêrdî û bêheskerdişî nêbîya.”
