Endamê ÎHD’yî yê Sêrtî Avûkat Orhan Çelîkî bale ante qerarê MHME’î yê “heqê hêvîye” ser o û vat: “Seba ke Birêz Ocalan rolê xo û mîsyonê xo bîyaro caardene, dewlete ganî qanûnanê ‘heqê hêvîye’ bîyaro caardene.”
Çelîkî ard vîrî ke avûkatê Ocalanî 2003î de seba “heqê hêvîye” muracatê Mehkemaya Heqanê Merdiman a Ewropa (MHME) kerdo û 18ê adare 2014î de MHME’î qerar da ke Tirkîya ganî seba Rayber Ocalan û heme tepîşteyanê sîyasîyan “heqê hêvî” bîyaro caardene. La Tirkîya nê qerarî 12 serrî yo nêana caardene.
Çelîkî vat ke raporê Komîsyonê Meclîsî de kêmanîyê girdî est ê û meseleya kurdan tede çin a. Vat ke şarê kurd zerrî ra prosesî ra bawer nêkeno çike heta nika yew gama şênbere nêameya eştene. Çelîkî dîyar kerd ke tepşê dewlete pê nêgênê û vat: “Serekê MHP’yî hetêk ra vano ‘rayberê awanker’ la hetê bînî ra zîndan de verdanê.”
Çelîkî vat ke seba proses dewam biko dewlete ganî mentalîteya xo bibedilno: nameyê kurdî yê herême newe ra bêrê nuştene, perwerdeyê ziwanê dayikî bêro dayene û tepîşteyê nêweşî yê ke 30 serrî ra zafêr zîndan de yê, bêrê veradayene. Çelîkî vat: “Caardişê ‘heqê hêvî’ ganî bibo gamêka tarîxî seba azadîya fîzîkîye ya Birêz Ocalanî.”
